Izicwangciso zesebe lezothutho eMpuma Koloni zokuba nenye inqwelomoya esebenza kwisikhululo seenqwelomoya saseMthatha ziyaqhubeka nokuhlanganisa umphunga. Isikhululo seenqwelomoya saseMthatha ngoku sisetyenziswa yiAirlink, ibonelela ngenkonzo yaseRhawutini kuphela.
Amagosa esebe, ekhokelwe nguMphathiswa, uWeziwe Tikana-Gxotiwe izolo edibene nomnye umdlali kushishino lwezophapho, iCemAir. Le yinkampani yeenqwelomoya enamava amaninzi ekusekweni ezo zibizwa ngokuba zizikhululo zeenqwelomoya ezincinci. Igqiza elisuka kwiCemAir belikhokelwa yingqonyela yenkampani, uMnu. Miles van der Molen.
UMphathiswa uTikana-Gxotiwe uyichophele indibano neCemAir njengengumqala kunye nevoti yokuzithemba kuqoqosho lwephondo leMpuma Koloni.
“Siziva sithobekile kukuba iCemAir yeyona ethe yathatha inyathelo lokuqala, nabo bayayibona into ebesiyishumayela ngesikhululo seenqwelomoya saseMthatha, njengeyona iqaqambileyo. Siyazi ukuba akukho nto igqityiweyo okwangoku, nangona kunjalo, sinethemba lokuba uthethathethwano lwethu luza kuqala kwaye siza kubona iCemAir ibonelela ngeenkonzo zophapho ezifuneka kakhulu kubantu abakwicala leMpuma yephondo lethu,” utshilo uTikana-Gxotiwe.
I-CemAir ithi inani le-shere lendawo yenkonzo yesikhululo seenqwelomoya liyakhuthaza kakhulu. Inkampani yeenqwelomoya yakhawuleza yachaza ukuba indlela ekhoyo yaseRhawutini izakuba lula ukuyisebenzisa, nangona kunjalo isicwangciso sexesha eliphakathi ukuya kwelide iyakuba kukuhlola iKapa elifunwa kakhulu ngokunjalo.