Abafundi abathathu baseOsborn Senior Secondary School KwaBhaca basafumana unyango esibhedlele ngenxa yesigulo esinxulumene nesisu.
Oku kulandela isiganeko apho abafundi abaku-324 bebebonakalise iimpawu zorhudo nokugabha ekuqaleni kwale veki, nto leyo ethe yakhokelela ekubeni balaliswe esibhedlele ukuze bafumane ukhathalelo oluyimfuneko.
Amagosa ezempilo athathe iisampulu kwimithombo enokubakho ukuze enze uvavanyo, ngenjongo yokuchonga imvelaphi yesi sigulo.
Isithethi sesebe lezempilo eMpuma Koloni uSizwe Kupelo, unike uhlaziyo ngale meko, esithi, “Ngabafundi abangaphaya kwamakhulu amathathu abasuka kwimishini yaseOsborn KwaBhaca abathe babalekiselwa kwiikliniki ezahlukeneyo nakwisibhedlele saseMadzikane ukuze bafumane unyango kulandela isigulo sorhudo nesisu esibuhlungu. . Isebe ngoku liphanda unobangela wokugula kwabo.”
Isebe lezempilo linike ingxelo yokuba imeko yaba bafundi bathathu abasesibhedlele izinzile.
