Abantwana abathathu, abaneminyaka emine, emihlanu kunye nesibhozo baphakathi kosapho lwabasixhenxe abadutyulwe de babhubha KwaZulu-Natal.
Okwangoku, isizathu sodubulwano lwangoLwesithathu ngokuhlwa sisengumxholo wophando lwamapolisa kwaye akukho mntu ubanjiweyo.
Ngokwengxelo yamapolisa, abamelwane babike ukuba beve izithonga zemipu ziphuma kwikhaya elikwingingqi yaseGoxa eHighflats. Athe akufika amapolisa kwindawo yexhwayelo, abhaqa imizimba yabangasekhoyo.
“Bekukho iikhatriji ezichithiweyo kwigumbi elichongwe ukuba lelokuhlala. Asixhenxe amaxhoba afunyenweyo kwaye onke abonakala ngathi adutyulwe,” ifundeka njalo ingxelo yamapolisa.
INkulumbuso yePhondo, uThamsanqa Ntuli, ukugxekile oku.
Uhlaba ikhwelo kumapolisa ukuba angashiyi nantoni na kuphando lwawo malunga nezi zigebenga zokubulawa kwabantu ngoburhalarhume eHighflats. UNtuli ukwavakalise ukuxhalaba kwakhe kakhulu ngezi zenzo zobundlobongela kwaye wamemelela ukuba zipheliswe kweli phondo.
INkulumbuso uNtuli uyalele uMkomishinala waKwaZulu-Natal uLieutenant General Nhlanhla Mkhwanazi ukuba abeke zonke izixhobo ezifumanekayo ukuze kubanjwe abenzi bobubi nokuqinisekisa ukuba ezi zenzo zenkohlakalo zihoywa ngokukhawuleza nangempumelelo.
“Sizinikezele ekuqinisekiseni ukhuseleko lwabo bonke abemi baKwaZulu-Natal. Sinqwenela ukudlulisa umyalezo wethu wovelwano kubantu abachatshazelwe sesi sehlo simanyumnyezi,” utshilo.
INkulumbuso ibilindeleke ukuba ihambe iye kulo mmandla ngentsasa yangoLwesine.
