Amalungu ophando lolwaphulo-mthetho oluququzelelweyo ephondweni aphanda ityala lokubulala kwanelokuzama ukubulala emva kwesiganeko sokudubulana kwisango lesibhedlele iLivingstone eGqeberha ngentseni yangeCawe.
Esi siganeko sishiye indoda enye ibhubhile, abanye ababini benzakele, logama owesine ukwazile ukubaleka kwindawo yexhwayelo.
Kubonakala ngathi esi sehlo sinxulumene nokubhubha kwelungu lemigulukudu elaziwayo, elibethwe lahlatywa kwisitalato iHabelgaarn eGelvan Park ngobusuku bangoMgqibelo.
Isithethi samapolisa uColonel Priscilla Naidu uthi umqhubi wemoto iNissan Sani emhlophe kunye nabakhweli abathathu bebeqhuba besuka kwisitalato iHabelgaarn besiya kwisibhedlele iLivingstone ngentsimbi ye-00:30 kusasa ngeCawe.
Uthe izithonga ezininzi zadutyulwa kwisithuthi ekungeneni kwesibhedlele, zenzakalisa umqhubi, ochongwe njengoGodfrey Jaggers, 34.
“Amanye amaxhoba amabini, indoda nebhinqa (abakwiminyaka yabo yamashumi amabini) nabo bafumene amanxeba okudutyulwa. Elesine likwazile ukubaleka.
Ngezithuba zentsimbi ye-22:40 ngoMgqibelo, ilungu leqela lemigulukudu elaziwayo laseGqeberha libhubhele emva kokubethwa nokuhlatywa kwisitalato iHabelgaarn.
UNaidu uthe amapolisa aphendule kwisikhalazo sokungena ngaphandle kwemvume kwindlu ethile.
Apha, ixhoba kutyholwa ukuba belihlaselwa liqela labantu.
Le ndoda yayinamanxeba amaninzi okuhlatywa kunye namanye amanxeba emzimbeni wonke.
Wasiwa kwisibhedlele esikufuphi, waza wasweleka kamva.
Ityala lokubulala liyaphandwa.
Kusafuneka kukhangelwe umkhondo wesizalwane somfi.
“Amapolisa arhanela ukuba la matyala anganxulunyaniswa noxa kunjalo uphando lusaqhuba. Ezi ziganeko zinxulumene nemigewu,” uqinisekise uNaidu.
