Bebephumile abalandeli ukuzakubukela amaqela abo kwiNothern Areas eGqeberha ngoMgqibelo.
Nazi iziphumo zeNdebe yeFain Premier Reserve eNorthern Areas phantsi kweNorthen Areas Football Association kwabangahlawulwayo nebezidlalwa ngoMgqibelo umhla wesithandathu (06) kweyeKhala kwimpelaveki esiphuma kuyo kumabala aseGavendale.
IWindvogel All Stars ibambene ngenqaku macala (1-1) ne-Apex United, inqaku le-All Stars lifakwe nguLargadien kanti ele-Apex lifakwe nguFloors. IWest Lake ibethe iRangers ngamanqaku amabini eqandeni (2-0), amanqaku eLake afakwe nguPiet omabini (2).
IBloem Stars ibethe iHotspurs ngamanqaku amabini kwiqanda (2-0), amanqaku eBloem afakwe nguJohnson noStuurman. IBloom Callies ibhaxabulwe yiFairview Rovers ngamanqaku amane kwelinye (4-1), uCasper uwafake ngokwakhe omane (4) amanqaku eRovers laze elokubika ekhaya leCallies lafakwa nguMatthews.
IPark United inqunqele egoqweni iShamrock ngamanqaku amathandathu eqandeni (6-0), lamanqaku ePark United afakwe nguVan Rooyan mabini (2), noDaniels wafaka awakhe amabini (2), uLoggenberg wafaka lalinye (1) noVaaltyn wafaka elakhe elinye (1) inqaku.
IStardrift yabetha iHelenvale ngamanqaku amabini kwelinye (2-1), amanqaku eStardrift afakwe nguMiller noJansen laze elokubika ekhaya leHelenvale lafakwa nguRussel.
IBlackpool ibethwe yiGlenville Celtic ngamanqaku amabini kwelinye (2-1), amanqaku afakwa nguBailey noHoffman beCeltic, elokubika ekhaya leBlackpool lafakwa nguBenn.
ISaints izibethele IFairdene ngenqaku elinye eqandeni (1-0), elinqaku leSaint lifakwe nguBaartman.
By Siphiwo Boqwana
