Amapolisa aseMpuma Koloni akhangela amadoda amathathu athi abambe amapolisa amabini eMonti ngoLwesine. Isithethi samapolisa ephondweni, uColonel Priscilla Naidu, uthi esi sehlo senzeke ngezithuba zentsimbi yeshumi elinesibini ekuseni. Uthe la magosa akwisikhululo samapolisa eBuffalo Flats ebesendleleni eya kujongana nesikhalazo ngethuba efikelwa ngamadoda amathathu awabuza ngebanjwa. UNaidu uthi emva koko baye babamba amapolisa amabini bewakhombe ngemipu baze bohlutha izixhobo ngelixa bethatha iiselfowuni zabo. Uthe ityala lokuphanga liyaphandwa. Ukuphangwa kwala mapolisa mabini kuqhambuke kwangaloo mini umphathiswa wamapolisa ebetyelele eBuffalo City ngelokuhlola inkqubo yeli phondo yeziyunguma ezikhuselekileyo. Kusenjalo, izikhululo ezibini zamapolisa aseMpuma Koloni beziphangwe ngabaphuli mthetho abaxhobileyo kulo nyaka. Ngenyanga yoKwindla amapolisa aqalise ukukhangela abarhanelwa abaphanga isikhululo samapolisa eSomerset East bathatha inani elingaziwayo lemipu. Kwinyanga ephelileyo, oonqevu baqinisekise ukuba “kuqhekezwe” kwisikhululo samapolisa eHogsback nalapho kwabiwa imipu.
