Inkundla yolonyulo inikwe de kube ngumhla wethoba (9) kuTshazimpuzi (April) ukuba imisele isibheno sombutho woMkhonto weSizwe (MK) kwiKomishoni eZimeleyo yoNyulo (IEC) yokurhoxiswa kobesakuba ngumongameli uJacob Zuma njengomgqatswa kulonyulo.
Kwiveki ephelileyo, i-IEC iye yavumelana nelinye ilungu loluntu elichasa uZuma ochithe inxalenye yesigwebo sakhe seenyanga ezilishumi elinesihlanu (-15) entolongweni ngenxa yokudelela inkundla.
Iqela leMK lithi lizakubhena kwesi sigqibo. Isithethi salo mbutho uNhlamulo Ndlela uthi bakholelwa ukuba banezizathu eziqinileyo zokucel’ umngeni ukukhululwa kukaZuma yi-IEC.
“UMongameli uZuma akazange avalelwe emva kuka Section 35 woMgaqo-siseko apho ebefanele ukuba phambi kwejaji kwaye kuxoxwe ngokufanelekileyo. UMongameli Zuma wavalelwa yiNkundla yoMgaqo-siseko ngaphandle kokunikwa ilungelo lakhe elikumgaqo-siseko lokuxoxwa kwetyala ngendlela enobulungisa. Ngoko ke, asinakuyibiza ngokuba lityala lolwaphulo-mthetho. Konke akwenzileyo kukujongela phantsi inkundla kwaye elo asilotyala, ngumcimbi wembambano kwaye umthetho we-IEC ubhekisa kumcimbi wolwaphulo-mthetho – ngoko ke zininzi izinto ezifuna ukuqwalaselwa apha.” utshilo uNdlela
