I-Democratic Alliance (DA) eMpuma Koloni ichaze ingxaki yamanzi ejongene nabemi bomaspala waseMakana eMakhanda, njengokuphulwa kwamalungelo asisiseko oluntu. Oku kuza nanjengoko uMzantsi Afrika uphawula uSuku lwamaLungelo oLuntu umhla wamashumi amabini ananye (21) kweyoKwindla.
I-DA ibibambe uqhankqalazo ngaphandle kweeofisi zomaspala waseMakana ngenxa yokunqongophala kwamanzi.
Kwiminyaka edlulileyo umasipala ebesokola ukubonelela ngamanzi rhoqo, ekhankanya iziseko zophuhliso ezindala, imfuno ephezulu kunye nembalela.
Okwangoku umasipala usebenzise ukulinganiselwa kwamanzi, njengeHowiesons Poort Dam, umthombo ophambili wamanzi aluhlaza osondela ekukhutshweni ngokupheleleyo kwamanzi.
“Sikhethe uSuku lwamaLungelo oLuntu ukukhumbula olu suku lubalulekileyo kunye nokufikelela kwethu kumalungelo oluntu kunye nokugxininisa ukuba uninzi lwabantu baseMakhanda, uninzi lwabo abamnyama nabangamahlwempu, abanakufikelela kwiinkonzo ezisisiseko ukuze babanike isidima abasidingayo ukuze bafumane loo malungelo oluntu kwaye bazive ukuba baphila ubomi obunenjongo obuyinxalenye yomgaqo-siseko wethu. Ngoko ke yiloo nto ibalulekileyo namhlanje,” itsho iNkokeli yePhondo ye-DA u-Andrew Whitfield ethetha nabeendaba zeSABC.
Imizamo yokufumana izimvo kumasipala ayiphumelelanga. Abemi bendawo bathi bebengenamanzi iiveki ezintathu.
Omnye wabemi abachaphazelekayo nguVerna Van Louw oneminyaka engamashumi amahlanu anesithandathu (56) ubudala, onyanzelwa ukuba asebenzise itanki yamanzi okanye ahambe imigama emide ukuze aye kukha amanzi.