Ibutho loPhando eliKhethekileyo (SIU) lifake isicelo kumongameli uCyril Ramaphosa ukuba alungise umba wokubhengeza uphando lorhwaphilizo kwiDyunivesithi yaseFort Hare.
Ukuba sithe samkelwa, esi sihlomelo, siphantsi kwengqwalaselo nguRamaphosa, sizakuvumela iSIU ukuba iphande izityholo zolawulo olugwenxa kunikezelo lweziidanga zee-Masters kule dyunivesithi.
Izityholo zolawulo olugwenxa kunikezelo ngezidanga eFort Hare zathe gqolo esweni ngethuba inkulumbuso yephondo leMpuma Koloni uOscar Mabuyane wasa iSIU enkundleni ecela umngeni kuphando lwayo malunga nokubhaliswa kwesidanga sakhe.
UMabuyane wanikwa isithintelo yiNkundla ePhakamileyo yaseBhisho enqanda iSIU ekwenzeni uphando ngokuwongwa ngezidanga zeMasters kule dyunivesithi ngeyeSilimela wonyaka ophelileyo, ngelithi oko kudlulela ngaphaya kwemida yesibhengezo esakhutshwa nguRamaphosa kweyeThupha ngo2022.
I-SIU ibisenza uphando ngezityholo zokusetyenziswa gwenxa kwemali, ukufunwa kwabasebenzi bakarhulumente ukuze bafundele iinkqubo ezahlukeneyo zefakhalthi ngumntu omnye ngenjongo yokuzizuzisa yena kunye nolawulo olugwenxa ekunikezelweni kwezidanga zee-Honours.
UMabuyane wacinywa kubhaliso ngeyeKwindla ka-2021 ngenxa yokungafezekisi eyona mfuno isezantsi yokungena kwinkqubo yee-Masters. Isigqibo sokucinywa kwakhe kubhaliso senziwe yindlu yeengwevu zale dyunivesithi kulandela uphando olwenziwa yidyunivesithi.
Obesakuba ngumlawuli kwikhampasi yaseFort Hare eBhisho nokwangumphathi wesebe lolawulo loluntu uNjingalwazi Edwin Ijeoma, warhoxa emva kokuba le dyunivesithi isungule uphando ngezityholo zobugwenxa bokwamkelwa nokubhaliswa kwabafundi bakhe ababini.
Ngethuba enika ingcaciso kwikomiti esisigxina yepalamente emalunga neengxelo zoluntu malunga nenkqubela phambili yophando lwecandelo lakhe ngomhla wamashumi amabini anesixhenxe kweyoKwindla kulo nyaka, intloko yeSIU, uAdvocate Andy Mothibi, uthe uphando lwaseFort Hare lusaqhubeka kwaye luneziphumo zalo.
Uthe emva kokuba uMabuyane efumene lo myalelo khange akwazi kuphanda ubugwenxa malunga nokunikwa kwezidanga zemasters.
“Inkundla ibonise ukuba umda wesibhengezo awuquki izidanga ze-masters – kwaye yaxela ukuba i-SIU kufuneka ifumane isilungiso kwisibhengezo,” utshilo.
“I-SIU iye yalungisa isilungiso kwaye yasingenisa kwiSebe lezoBulungisa ngeyeKhala 07, 2023 ukuze isibhengezo siqhutywe,” wongezelela.
I-SIU ingenise ingxelo yayo yokuqala yethutyana kuRamaphosa ekupheleni konyaka ophelileyo.
UKganyago uthe, iSIU iceba ukungenisa ingxelo yesibini yethutyana kuRamaphosa ngomhla wamashumi amathathu ananye kuTshazimpuzi, watsho esithi ukulungiswa kwesi sibhengezo yenye yezinto ezibangela ukuba ingakwazi ukugqibezela ingxelo yayo.
Ngomhla wesibhozo kweyoKwindla, inkokeli yeDA uJohn Steenhuisen, ubuze uRamaphosa kuxwebhu yemibuzo ebhaliweyo epalamente ukuba ulugunyazisile kusini na uphando olwenziwa yiSIU ngezityholo zobuqhophololo obujoliswe kuMphathiswa weNkonzo kaRhulumente noLawulo uNoxolo Kiviet. USteenhuisen ukwabuze ukuba ngaba uphando lugqityiwe na kwaye zithini iziphumo.
Kwimpendulo yakhe, uRamaphosa uthe ezi zibhengezo zeSIU azenzelwanga mntu uthile koko zinxulumene nezityholo zolawulo olugwenxa kunye nezenzo ezigwenxa malunga nemicimbi yeziko likarhulumente.
“Ndaziswa yiSIU ukuba uphando lusaqhubeka,” utshilo kwimpendulo yakhe.
By Siyakholwa Vuso
