By Siphiwo Boqwana.
INkokheli yabadlali beqela leeProteas kumdlalo vavanyo wamazwe ngamazwe, uWiaan Mulder, wenze imbali njengoyena ophambili kubaqhokri boMzantsi Afrika kwihlabathi ngethuba eqhoka amakhulu amathathu anamashumi amathandathu anesixhenxe (367) emitsi kwiibhola ezingamakhulu amathathu anamashumi amathathu anesine (334) ajongene nazo, ephuma exwaye uphini lakhe phambi kokuba anikezele kwiZimbabwe ukuba inyuke umnqantsa.
Oku kwenzeke izolo eBulawayo, eZimbabwe, Zimbabwe, ngethuba bequbisana neZimbabwe ngomhla wesibhozo (08) kwinyanga yeKhala kumdlalo vavanyo wesibini (2). IiProteas ziphumelele lo mdlalo ngamangenelo nemitsi engamakhulu amabini anamashumi amathathu anesithandathu (236) kusuku lwesibini (2) lwalo mdlalo vavanyo.
UMulder, onamashumi amabini anesixhenxe (27) ubudala nosele edlale imidlalo engamashumi amabini (20) ukuzakuthi gaa ngoku, akangomdlali ogxile kakhulu ekuqhokreni koko ugxile ekuphoseni iApile laseJava umthetho wakhe. Ukuba siyajonga ekudlaleni kwakhe uWiaan, uqale ukwenza amashumi amahlanu (50) emitsi ngenyanga yeDwarha kunyaka ophelileyo ka2024, emva koko wenza ikhulu (100) lemitsi izihlandlo ezimbini (2).
Lo kapteni weeProteas womdlalo vavanyo uphose nje kancinci ukuba enze okanye ophule irekhodi legqala leWest Indies, uBrian Lara, nalapho aphose nje ngemitsi engamashumi amathathu anesithathu (33) kuphela.
Kungoku nje uWiaan Mulder uhleli uthe ngcu kwindawo yesihlanu (5) kuluhlu labadlali behlabathi ukuqhokra imitsi ephezulu. UMulder ususele ecaleni ngethuba esehlisela igqala lakudala uGarry Sobers weWest Indies, eyokuhlala kwindawo yesithandathu ngoku.
Osahleli kwindawo yokuqala kulamanqwanqwa ehlabathi ekuqhokeni kumdlalo vavanyo ligqala uBrian Lara nowenza amakhulu amane (400) emitsi ngethuba bequbisene neqela leqakamba laseNgilane kumabala iSt Johns.
Kwindawo yesibini ngokuqhoka kumdlalo vavanyo singabalula uMatthew Hayden weqela leqakamba laseAustralia nowenza amakhulu amathathu anamashumi asibhozo (380) emitsi ngethuba bedlala neZimbabwe ngonyaka ka2003.
Kanti igqala leWest Indies uBrian Lara, waqala ukwenza irekhodi ngonyaka ka1994 eqhokra amakhulu amathathu anamashumi asixhenxe anesihlanu (375) phambi kokuba alophule ngonyaka ka2004.
Kulo mdlalo wovavanyo wamazwe ngamazwe ehlabathi nobubanjelwe eZimbabwe kwaBulawayo kuqale kwaqhokra iZimbabwe kumangenelo okuqala, iZimbabwe yenze ikhulu elinamashumi asixhenxe (170) iphuma yonke emva kwenijikelo engamashumi amane anesithathu (43), waphendula uMzantsi Afrika wenza amakhulu amathandathu anamashumi amabini anesithandathu phulukene noothinti abahlanu( 626/5) kwimijikelo elikhulu elineshumi elinesine (114).
UMzantsi unike iZimbabwe ukuba uqhokre kumangenelo esibini (2) yabuya nganeno kakhulu iZimbabwe ngethuba isenza amakhulu amabini anamashumi amabini emitsi iphuma yonke (220) kwimijikelo engamashumi asixhenxe anesixhenxe neebhola ezintathu (77.3).