Siqalile phezolo isigaba soompondo zihlanjiwe kwiNdebe yeHlabathi
Imitsi kaQuinton de Kock ilincedile iqela loMzantsi Afrika ngethuba liqubisena neMelika phezolo kumdlalo wokuqala (1) weSuper8 kwiNdebe yeHlabathi yeQakamba. UMzantsi Afrika uphumelele itoss wagqiba kwelokuqhokra kuqala.
Ulivulile ikhwapha ude Kock ngethuba esenza amashumi asixhenxe anesine (74) emitsi kwiibhola ezingamashumi amane (40). IiProteas zenze ikhulu elinamashumi alithoba anesine emitsi iphulukana noothinti abane (194/4).
Lomdlalo ubudlalwa ngoLwesithathu ukutsho oko phezolo umhla weshumi elinethoba (19) kule imiyo inyanga kumabala iSt Vivian Richards e-Antigua.
IMelika iphendule ngokwenza ikhulu elinamashumi asixhenxe anesithandathu emitsi bephulukana noothinti abathandathu (176/6).
UAndries Gous owayesakudlalela iqela lalapha eMzantsi iKnights uqhokre amashumi asibhozo (80) emitsi kwiibhola ezingamashumi amane anesixhenxe (47) ajongene nazo ephuma exwaye uphini lakhe.
UKagiso Rabada uthathe oothinti ababini (2) ebethwa imitsi nje emithandathu (6) kwi-‘Overs ezimbini (2) zokuqala. Uphele umdlalo uRabada efumene oothinti abathathu (3) ebethwe imitsi elishumi elinesibhozo (18) kwi-Overs ezine (4).
IiProteas ziphumelele ngemitsi elishumi elinesibhozo (18) kulomdlalo.
By Siphiwo Boqwana
