By Esona Magawana
iMayibuye Transport Corporation (MTC), iziko leSebe lezoThutho eMpuma Koloni, isungule ngokusesikweni ibhasi entsha elungele abantu abakhubazekileyo ngoLwesibini, umhla wamashumi amabini anesibhozo 28 kweyeDwarha 2025.
Lo msitho wokuphehlelelwa ububanjelwe kwindawo yokugcina iMTC eZwelitsha eQonce kwaye ubuzinyaswe ngabachaphazelekayo kwicandelo lezothutho kunye nabahlali. Eli phulo lihambelana nomnqophiso weSebe lezoThutho wokuphucula ukushukumiseka kwabo bonke abahlali, ingakumbi abantu abakhubazekileyo abasoloko bedibana nemiqobo xa besebenzisa izithuthi zikawonke-wonke.
Le bhasi yakhiwe ngokukhethekileyo ngeempawu zokufikelela kwihlabathi jikelele, kubandakanywa ukunyuswa kwesitulo esinamavili, indawo yokungena ekumgangatho ophantsi, indawo yokuhlala ephambili, kunye nezinye izixhobo zokhuseleko ukuqinisekisa amava okuhamba akhuselekileyo nesidima kubo bonke abakhweli.
UMphathiswa wezoThutho, uXolile Nqatha, uncome i-MTC ngobunkokeli bayo kunikezelo lweenkonzo olubandakanyayo. “Esi siganeko sibalulekileyo sibonakalisa ukuzinikela kwethu okungagungqiyo ekudaleni inkqubo yezothutho ephakamisa amalungelo nesidima sabo bonke abantu kuquka nabo bakhubazekileyo,” utshilo uMphathiswa uNqatha.
“Ngokusebenzisa iinguqulelo ezinjengezi, siqhubeleka ukwenza inkqubela phambili enentsingiselo ngokubhekiselele kubume bezothutho obulinganayo eMpuma Koloni”.
Oku kongezwa kwizithuthi ze-MTC linyathelo elibalulekileyo lokuqhubela phambili ukubandakanywa koluntu ngokuguqulwa kwenkqubo yezothutho yaseMpuma Koloni.
