INkulumbuso yePhondo leMpuma Koloni uLubabalo Oscar Mabuyane uthethe ngomba wobusela bemfuyo obugquba kweli phondo, ebalula ukuchaphazeleka kwezoqoqosho kumafama asakhasayo asezilalini. Xa bekuphehlelelwa ukuChongwa kweMfuyo kunye neNkqubo yokuLandelelwa, iLivestock Identification Traceability System – LITS ngolwasemzini, kuTsolo, uMabuyane ubethelele ukuzimisela kukarhulumente ukulwa olu lwaphulo-mthetho ngezisombululo zobuchwephesha obutsha.
UMabuyane uyibethelele ilahleko ekhwankqisayo ngenxa yokubiwa kwemfuyo, ecaphula amanani akutshanje ezilwanyana ezingaphaya kweshumi elinesibhozo lamawaka ezixabisa imali engaphaya kwamashumi amahlanu anesibhozo ezigidi zeerandi ezibiweyo kweli phondo. Le lahleko ayijongeli phantsi kuphela impilo yamafama asemaphandleni kodwa ikwachaphazela kakubi uqoqosho lwephondo, ngakumbi njengoko iMpuma Koloni idume ngemveliso yayo yemfuyo.
Inyathelo le-LITS lazisa indlela eqhutywa bubuchwepheshe kulawulo lwemfuyo, ibonelela ngezixhobo zokuphawula imfuyo, kumashishini amafama eenkomo alikhulu namashumi amabini (120), kuxhamle malunga namawaka angamashumi amathathu (30,000) eenkomo kwiphondo liphela. UMabuyane ugxininise ngelithi le nkqubo ayijongi kuphawu lwezilwanyana kuphela kodwa nokukhangela imvelaphi yazo ngempumelelo, iququzelela indlela elungeleleneyo neyorhwebo ekuphatheni imfuyo.
UNonkqubela Pieters, uMphathiswa woPhuhliso lwamaPhandle noHlengahlengiso lwezoLimo, ubalule ukubaluleka kwe-LITS ekuncedeni amafama, ngakumbi kwiindawo ekubiwa imfuyo eninzi njengakuTsolo. Le nkqubo inceda amafama ukuba agcine iirekhodi ezibanzi zeenkomo zawo, inceda kulawulo lwezifo nokuqinisekisa ulawulo olululo lwamayeza.
UXolile Nqatha, uMphathiswa wezoThutho, uKhuseleko loLuntu, noNxibelelwano, ugxininise indima ye-LITS ekuqiniseni iinzame zokuthotyelwa komthetho ngokuchasene nokubiwa kwemfuyo. Ukusebenza kwale nkqubo kuvumela ukukhangelwa kwezilwanyana kubanini bazo, inceda kwiinzame zokubuyisela nokuququzelela ukubanjwa kwabenzi bobubi.
Nangona kukho ukuthandabuza phakathi kwamafama malunga nokusebenza kwezixhobo zokuphawula ekuthinteleni ubusela, urhulumente usazimisele ekuzibopheleleni ekulweni ubusela bemfuyo ngomiliselo lwe-LITS. Ngokusebenzisa ubuchwepheshe kunye nentsebenziswano phakathi kwee-arhente zikarhulumente kunye namafama, eli nyathelo lijonge ukunciphisa ifuthe lobusela bemfuyo kunye nokukhusela umdla woluntu lwasemaphandleni.