By Buhle Nomgalasa.
UMbutho woMkhonto weSizwe (MK) uphinde wenza iinguqu kwiqumrhu lawo, ususa umbhexeshi oyintloko uMzwanele Manyi kwisithuba esingaphantsi kweenyanga ezintandathu (6) engene kwesi sikhundla. Olu tshintsho lenza uManyi abe ngumbhexeshi wesibini oyintloko kulo mbutho ukususwa ngokungekho sikweni ukusukela oko lo mbutho wangena ePalamente njengombutho ophikisayo ngokusemthethweni.
Endaweni yakhe kungene umntu omtsha, uColleen Makhubele, nowaziswe nguSomlomo ngoLwesibini. UManyi wafungiswa njengelungu leMK Party ePalamente (MP) ngeyeThupa ngonyaka ka-2024 ngaphambi kokuchongwa kwakhe njengombhexeshi oyintloko weqela.
UManyi wazibandakanya neMK Party emva kokushiya iEconomic Freedom Fighters (EFF) waza wafungiswa kunye naba besakuba ziintloko zaMashishini kaRhulumente ezifana nowayesakuba yiNqonyela yePassenger Rail Agency of South Africa (PRASA), uLucky Montana, kunye nowayesakuba yiNgqonyela yakwaEskom, uBrian Molefe.
UManyi wayilahla iEFF, kunye nowayesakuba nguSekela-Nkokheli wayo uFloyd Shivambu, inyathelo elashukumisa iibharethi ezibomvu.
NgoLwesibini, uSomlomo weNdlu yoWiso-mthetho uThoko Didiza uchaze uMakhubele njengoMbhexeshi omtsha kule Ndlu.
“Ndingathanda ukuthatha eli thuba phambi koshishino lweNdlu namhlanje ukwamkela umbhexeshi omtsha wombutho ophikisayo weMK Party, uNksz Makhubele,” utshilo uDidiza.
Ebhengeza ngokushenxiswa kukaManyi kumyalezo oya kumalungu, inkokeli yombutho ePalamente, uJohn Hlophe, uthe baqinisekile ukuba uMakhubele uzakukhokela ngamandla nangombono.
