By Asemhle Mbete.
ISebe lezeMfundo esiSiseko lithi lenze inkqubela ethe gqolo ekuqukunjelweni koMthetho oLungisiweyo weMithetho yeMfundo esiSiseko (Basic Education Law Amendment – BELA Act) oza kulawula indlela oza kuphunyezwa ngayo lo mthetho.
UMphathiswa weMfundo esiSiseko uSiviwe Gwarube, oo-MEC bezemfundo ephondweni kunye neentloko zamasebe ngoLwesibini banike ikomiti ejongene nesebe lemfundo uhlaziyo malunga nemigaqo amalungu ekomiti ebeyilindele ngolangazelelo.
UGwarube uxelele le komiti ngoLwesibini, umhla wesibhozo (08) kweyeKhala 2025, ukuba nangona kukho umsebenzi oqhubekayo kwimigaqo, umthetho weBELA ngokwawo usaphunyezwa.
Umphathiswa uthe ishumi loyilo lwemithetho sele likwinqanaba eliphezulu kwaye liza kuqukunjelwa ngexesha elifanelekileyo.
Isebe lathi le migaqo ibandakanya imfundo yamakhaya, iBakala R, ulawulo lokukhulelwa kwabafundi kwakunye nomgaqo wokuziphatha, phakathi kwezinye izinto.
“Kwaye ngokukhawuleza ukuba loo nkqubo yenziwe, iya kupapashwa. Kwaye ke, isigaba sokuqala semimiselo kufuneka siphume ngokukhawuleza.”
UMphathiswa uGwarube uthe le migaqo ixhasa nje ukuphunyezwa koMthetho we-BELA kwaye ayipapashwa okwangoku ayithethi ukuba abawuphumezi lo mthetho.
