ISebe lezeMfundo eMpuma Kapa likhuphe isaziso sokurhoxisa ubhaliso lweSikolo iBergview College kulandela izityholo zokungahoyi kakuhle ityala lodlwengulo elibandakanya uMfundi oneminyaka esixhenxe (7) ubuncinci.
Eli Sebe lithathe amanyathelo angqingqwa lokucinywa kwesikolo esizimeleyo iBergview College kwisithili semfundo i-Alfred Nzo West. Oku kulandela izityholo zokuba esi sikolo saliphatha kakubi ityala lodlwengulo elibandakanya umfundi oneminyaka esixhenxe ubuncinci kwaye basilela ukusebenzisana nabasemagunyeni.
Ngokwengxelo ekhutshwe lisebe, esi sikolo sophule omnye wemiqathango engundoqo yokubhaliswa kwezikolo ezizimeleyo, ekukubonelela ngendawo yokufunda ekhuselekileyo nethembakeleyo.
“Ityala lodlwengulo lavulwa ngeyeDwarha ka-2024, kwaye ukuza kuthi ga ngoku, lo mba awukaqhubeli phambili, ulibaziseko lubangelwa ngabaphathi besikolo,” ifundeka ngolu hlobo ingxelo.
Amagosa esebe avakalise inkxalabo ngokuziphatha kwenqununu yesi sikolo, ekutyholwa ukuba yalile ukusebenzisana namapolisa oMzantsi Afrika (SAPS) ngethuba kuqhutywa uphando.
Kwiphulo lokubeka phambili ukhuseleko lwabafundi, isebe lemfundo likhethe ukurhoxisa ubhaliso lweKholeji yaseBergview njengesikolo kwiphondo.
“ISebe eli lijonga eli tyala ngendlela enzima kwaye lizamile ukuthatha amanyathelo ukukhusela bonke abafundi esikolweni,” icacisa ngakumbi le ngxelo.
Amagosa eSebe leMfundo asityelela ngokwawo isikolo esisa isaziso sokucinywa kubhaliso, yaye abameli besikolo bavuma ukuba bayifumene ileta.
Esi sigqibo siya kuqala ukusebenza kwiiyure ezingamashuymi amabini anesine (24), kwaye isebe liya kuqalisa ngokufaka abafundi baseBergview College kwizikolo ezizezinye ezikuloo ngingqi.
“ISebe lizibophelele kukhuseleko nentlalo-ntle yabafundi kuzo zonke izikolo. Siza kusebenzisana nabo bonke abathathi-nxaxheba ukuqinisekisa ukuba ukhuseleko lwabantwana luba yinto ephambili,” litshilo isebe.
Abazali kunye namalungu oluntu baye babonakalisa ukusabela okungafaniyo, abanye besamkela inyathelo njengoko kuyimfuneko kukhuseleko lwabafundi, ngelixa abanye bexhalabile ngokuphazamiseka kwemfundo yabantwana babo.
Nanjengoko eli tyala liqhubeka, abasemagunyeni babongoza iKholeji yaseBergview ukuba isebenzisane ngokupheleleyo ne-SAPS ukuqinisekisa ubulungisa kwixhoba.
