Bazakuvela okwesibini enkundleni yamatyala abongikazi abathathu baseMpuma Koloni abatyholwa ngokubetha kwanokuzama ukubulala. Isithethi samapolisa uWarrant Officer Majola Nkohli uthi la madoda mathathu, aphakathi kweminyaka engama-23 nama-35 ubudala, avele okwethutyana kwinkundla kamantyi yaseLady Grey ngoMvulo kwaye agcinwe eluvalelweni. Uthi umkhwetha uhlaselwe kakubi kwesinye sezikolo zokwaluka kwingingqi yaseLady Grey ekuqaleni kwale nyanga. UNkohli uthi ixhoba elineminyaka engamashumi amabini anesibini (22) linamanxeba amabi okutsha kunye nokwenzakala kumalungu awohlukeneyo omzimba walo nto leyo ethe yalibeka kwi-ICU esibhedlele. Uthi aba babanjwa ngomnye wabaninzi eMpuma Koloni njengenxalenye yamaphulo abo aqhubekayo kwabo bachasene nomthetho iCustomary Initiation Act 2 ka 2021. Amapolisa abambe abarhanelwa abangamashumi asibhozo ukuzothi ga ngoku ishumi elinesithandathu ngabasetyhini, abavumele amakhwenkwe akwiminyaka elishumi elinesithathu ukwenza ulwaluko. UWarrant Officer Nkohli uthi abanye abantu ababanjiweyo ngabokubulala. Uthi ngaphezu koko, bangama-175 abakhwetha abahlangulwe kwizikolo ezingekho semthethweni ngeli xesha lo gama izikolo ezininzi zitshatyalalisiwe. Abongikazi abathathu abaseluvalelweni ngoku baza kunikwa ummeli osemthethweni ngoLwesine.
