Kukhethwe abadlali abaye bagqama kwimpela-veki esiphuma kuyo yendebe yeNedbank. Eli qela libhengezwe emva kokuba kudlale imidlalo emibini yamandulela kamagqibela kankqoyi wendebe yakwaNedbank.
Ukhumbule ukuba iPirates ibidlala neChippa nalapho ezimnyama ngenkani ziye zakwazi ukuzibekela indawo kumagqibela kankqoyi neSundowns ebethe iStellenbosch nebiqala ukubethwa emva kwemidlalo engamashumi amabini anesine ingabethwa.
Kungoku nje silinde amagqibela kankqoyi ngomhla wokuqala kweyeSilimela ukutsho oko kwinyanga ezayo. Lo mdlalo wePirates neSundowns uzakudlalelwa kwiphondo laseMpumalanga kwibala laseMbombela.
Eli qela libhengeziweyo linabadlali abaninzi beSundowns. Akukhethwanga mdlali kwiChippa United kanti mnye kwiStellenbosch FC. Kukhethwe abadlali abane kwiPirates kwakhethwa abathandathu kwiSundowns nebethe iStellenbosch FC ngamanqaku amabini kwelinye (2-1).
Abadlali abachongiweyo nguRonwen William’s, uRivaldo Coetzee, Khuliso Mudau, Marcelo Allende, Thembinkosi Lorch noThapelo Morena (nobe ngumdlali obekhethwe njengobalaseleyo emdlalweni wangeCawa) beSundowns. Abanye abafakwe kweliqela ngu-Iqraam Rayners weStellenbosch FC. Kwafakwa uKabelo Dlamini okhethwe njengomdlali obalaseleyo kumdlalo wangomgqibelo nothe wafaka amanqaku amabini, ibe nguThapelo Xoki nofake inqaku lesithathu kumdlalo wabo neChippa, Relebohile Mofokeng noMakheleni Makhaule bePirates.
Ibengumothuko into yokuba uPatrick Maswanganyi angafakwa kweliqela emveni kokuba encedise ekufakweni kwamanqaku amabini ngethuba bebethe iChippa United ngamanqaku amathathu kwelinye (3-1).
By Siphiwo Boqwana
