Kubhubhe abantu ababini konzakala abanye abasibhozo kwingozi yemoto enye eyenzeke kweliphondo leMpuma Koloni ngobusuku bangoLwesihlanu.
ISebe lezoThutho ePhondweni lithi le ngozi yenzeke kwindlela emanzi kuhola wendlela uN2 EmaXesibeni (eyayifudula ikwiMount Ayliff) kwicala laseKokstad.
Isithethi salo sesebe lezothutho kwiphondo leMpuma Koloni, u-Unathi Binqose, uthi umqhubi weveni ye-Isuzu uphulukene nolawulo lwemoto yakhe yabhukuqa.
Uthe bebelishumi elinesihlanu abantu ebebekhwele ngasemva kwisithuthi kwaye abantu ababini bawe ngasemva babhubhela kwindawo yexhwayelo.
Abantu abasixhenxe bonzakele ngokumasikizi ngelixa abanye abasixhenxe befumene umonzakalo ongephi. Bonke abonzakeleyo basiwe kwisibhedlele sephondo ukuze bafumane unyango.
UBinqose uthi ityala lokubulala ngokungenanjongo liphandwa ngamapolisa EmaXesibeni.