UMbutho we-African National Congress (ANC) uthe ukunqunyulwa kwezibonelelo zabaphathiswa akuzuyingenisa imali eyaneleyo ukuxhasa uhlahlo lwabiwo-mali lwaseMzantsi Afrika lwe-R2.7 triliyoni.
Lo mbutho uthe ukunyuswa kwerhafu yexabiso elongeziweyo (VAT) ngepesenteji enye kule minyaka-mali mibini izayo kukuphela kwesisombululo sokuba urhulumente aqhubeke nokuxhasa ngezimali iinkqubo zakhe ezibalulekileyo.
NgoLwesine, i-ANC ibibambe indibano noonondaba eRhawutini ivakalisa inkxaso yayo kwizindululo zohlahlo lwabiwo-mali ebezithe thaca ePalamente kutshanje nguMphathiswa wezemali uEnoch Godongwana.
Phakathi kweengcebiso ezininzi ezenziwe ngamaqela aphikisayo njengenye indlela yokunyuswa kwe-VAT kukucutha iKhabhinethi yoRhulumente woManyano lweSizwe (GNU).
UFikile Mbalula onguNobhala Jikelele woMbutho i-ANC uthe kukhona ukucuthwa okuninzi kwizibonelelo zabaphathiswa kule minyaka idlulileyo.
“Abaphathiswa bebeqhuba iimoto ezixabisa imali ekwisigidi seerandi, yaphungulwa yaya kutsho kwi-R500,000. Izinto ezifana namakhadi okuthenga ngetyala ziye zathathwa. Abaphathiswa baqhuba uqoqosho oluhambayo, olwathi lwanqunyulwa ngokunjalo kushishino oluhambayo ekuhlaleni.”
UMbalula uthe nangona kubalulekile ukucutha inkcitho karhulumente, ukunyuswa kwerhafu kuphela kongenelelo olubambekayo lokugcina ingeniso karhulumente kwinqanaba elifunekayo.