Ilizwe loMzantsi Afrika ngoku lineentsuku ezingamashumi amane (40) ngaphandle kokucinywa kombane ngenxa “yeenzame ezicwangcisiweyo nobunjineli beqela lakwa-Eskom” hayi kuba urhulumente ejonge kunyulo ekupheleni kwale nyanga, utshilo uMphathiswa wezoMbane uKgosientsho Ramokgopa ngoMvulo umhla wesithandathu (6) kuCanzibe 2024.
URamokgopa uxelele indibano yoonondaba ukuba ukukwazi ukunqanda ukucinywa kombane kungenxa yolungiso kulo nyaka uphelileyo kwakunye nokuhla kwemfuneko yezinga eliphezulu lombane.
“Into esiyaziyo yeyokuba ilahleko yomthamo engacwangciswanga ilandela umkhondo malunga nomyinge wepesenti ongamashumi amabini anethoba ekhulwini (29%) ukusukela kuTshazimpuzi ka-2024, ngokuchaseneyo nomyinge wepesenti ongamashumi amathathu anesine ekhulwini (34%) KuTshazimpunzi ka-2023,” utshilo.
“Asikwazi ukuvele siphelise ucimi-cimi wombane okanye sibuyise ipesenti yesihlanu ngesiquphe kuba usuku lolonyulo sele lubhengeziwe,” utshilo uRamokgopa, ekwathi, ngenxa yabasebenzi bakwa-Eskom bayaboleka.
“Ngelixesha iqela lisenza ezi nzame, xa sasinyusa ugcino olucwangcisiweyo ngoDisemba nangoJanuwari, sasingazi ukuba kuya kubakho umhla omkhulu wokuvota,” utshilo.
“Esi sisiphumo senkqubo yokwenza imephu, ngokwemigaqo yobunjineli, ukuzinziswa kwabaphathi abaqinisekisa ukuba sisebenzisa kwaye sihambisa le ntlawulo yemali ifunyenwe kwi-ofisi kanondyebo wesizwe, sichonga izikhululo zabagqatswa ezinokusinika eyona mbuyekezo ilungileyo ngexesha elifutshane.”
“Akukho lunxulumano phakathi kwalo msebenzi kunye nomhla wamashumi amabini anethoba (29) kuCanzibe,” utshilo.
Kusenjalo abanye abathandabuzayo bathi uEskom ukwazile ukugcina izibane ngokutshisa ngakumbi idizili kuba umbutho olawulayo iANC unexhala lokuba ukumisa ukucima kombane xa kusondele unyulo kungaphazamisa amathuba abo nabavoti.
Kodwa uRamokgopa uzikhabile ezi zityholo, esithi eli ziko lithembele kuphela kwisondlo. Wongeze ngelithi u-Eskom ulindele ukusebenzisa idizili encinci kulo nyaka-mali kwaye angaphindi imeko yanyakenye apho uchithe amashumi amabini ananye eebhiliyoni.
URamokgopa uthe ibhodi yakwaEskom ikwindlela yokuphelisa ukucinywa kombane emva kokufikelela kwithagethi ye-65% yokufumaneka kwamandla – umlinganiselo wokusebenza kweplanti ngo-2024 kunye ne-70% ngo-Epreli ka 2025.
U-Eskom ubona umkhwa oncomekayo kwinjongo yakhe yokuphelisa ukucinywa kombane, utshilo uRamokgopa ngoMvulo. Esithi akazukwenza ibango lobuxoki lokuba sebelapho, kodwa esithi bazafika ngokukhawuleza kakhulu kunokuba bebelindele.
Uthe ukubuyiswa kwenkonzo yeyunithi yesine yeMedupi eneemegawathi ezingamakhulu asibhozo (800MW), iyunithi yesibini yaseKoeberg (980MW) kunye nokudityaniswa yeyunithi yesithandathu yaseKusile (800MW), ezakongeza u-2 580MW ombane kwigridi kwiinyanga ezintandathu ezizayo, kuza kuqhubeka ukuphucula amathuba ka-Eskom, ingakumbi kwiinyanga zasebusika.
Kwingxelo yangeCawa umhla wesine kuCanzibe, u-Eskom uthe kwezi veki zimbalwa zidlulileyo “kubekho ukuphucuka okungaguqukiyo nokubonakalayo ekuthinteleni ukucima okungacwangciswanga – ngenxa yempumelelo yesicwangciso sokusebenza sokubuyisela esiqale ngoMatshi ka-2023”.
