UMphathiswa weSebe lezeMpilo eMpuma Koloni uNtandokazi Capa, undwendwele isikolo samabanga aphakamileyo iZwelitsha Senior Secondary School kwilali yaseGxwaleni kuNtabankulu, enengxelo zelona nani liphezulu lolutsha olukhulelwayo kulo nyaka uphelileyo nakulo nyaka.
Kutyholwa ukuba esi sikolo besinabafundi abakhulelweyo abangamashumi amabini anesixhenxe (27) kulo nyaka uphelileyo, kwaye alishumi elinesithoba (19) amatyala aziwayo okukhulelwa, lo gama amanye amantombazana alishumi elinesithathu (13) engabuyelanga esikolweni, ekukholelwa ukuba nawo akhulelwe.
Uninzi lolutsha olukhulelweyo luphakathi kweminyaka elishumi elinesithathu (13) ukuya kwelishumi elinesithandathu (16) ubudala. Igqiza elikhokelwa nguMEC Capa liza kubonelela ngovavanyo lwe-TB, uvavanyo lwe-HIV kunye nezinye izifo ezosulela ngokwabelana ngesondo, kunye nokufundisa ngokucwangcisa kunye nothintelo lwezifo ezosulela ngokwabelana ngesondo.
UCapa uthi, “Ewe, sixhalabile kakhulu njengesebe kwaye ndiza kuthetha-thethana namahlakani ethu sibone ukuba asinayo na indawo yolutsha kuba kumaziko ethu esikwaziyo ukufumana imali, siyaseka iindawo ezibizwa ngokuba ziindawo zolutsha.”
“Iindawo ezinobuhlobo kulutsha kwaye sikwafumana abongikazi abasebatsha ukuze bakwazi ukunxulumana nabo ngokukhululekileyo. Ke, sisebenzisana namaqabane ethu ukuze sikwazi ukuvula indawo yolutsha kwesi sakhiwo sikufutshane apha.”