By Siphiwo Boqwana
IQela lebhola ekhatywayo neliziinjinga ezikhuseleyo kwiPremier Soccer League yoMzantsi Afrika liyibhaxabulile i-Orlando Pirates ngamanqaku amane kwinqaku elinye (4-1). Nangona umdlalo ubumhle umkhulu ubukeleka kuxhelwana kuhlaselwana ngalamaqela omabini kodwa kumanqaku iqela lasePitoli khange liliqhelisele iqela lebhola ekhatywayo laseSoweto.
Abalandeli balamaqela mabini alambele indebe yeligi kwibhola ekhatywayo yoMzantsi Afrika bebephume ngonina bezokuzibonela xa inamba isombuluka kumabala eseLoftus eTshwane kulempelaveki siphuma kuyo ngoMgqibelo umhla wesibhozo (08) kweyoMdumba yona inyanga neyinyanga yothando.
Amatikiti ebethengwe onke kulomdlalo yiyo lonto ibingumbo nomxesiba iyinkungu nelanga kulamabala eMamelodi Sundowns nebingabasindleki kulomdlalo. ISundowns ize kulomdlalo ihamba phambili ngamanqaku amathandathu onke kwindawo yokuqala ishiya ngasemva kwindawo yesibini iBhakabhaka nesandokubhungca ngomnqongo kwidabi laseSoweto ngethuba bezibethela Amakhosi kumabala i-Soccer City.
Emva kwalomdlalo iminwana-phezulu izibona sele ibethwa ngumoya phezulu ishiya ezimnyama ngenkani ngamanqaku alithoba onke. Umdlali othe wazityela itheko yangathi ngumgidi wakhe kulo mdlalo ibe ngumfana wangaphesheya kolwandle uRibeiro Costa nofake amanqaku amabini (2) kulomdlalo, naye uTebogo Mokwena ufake inqaku lakhe elihle apho esongeza kwelitheko.
Amasandawana aye ekhefini sele enqenqeza phambili ngamanqaku amabini eqandeni (2-0). Ezikamagebhula zibuye sele zivutha okwamalangatye ngethuba umdlali wase-Namibia, uDeon Hotto, efaka inqaku lokubuyisela iqela lakhe emdlalweni, kodwa kuthe kanti iSundowns ayithezekanga mandla kukungena kwelinqaku. Loo nto yabenza bakhuthazeka ngakumbi batsho bayinto ibila kwiPirates becela ukuvulelwa nguSipho Chaine ezimpondweni, nyani ngelingeni wazibona evulile unozinti weBhakajuju. Omnye umdlali ofake inqaku kulomgidi kwi-Sundowns ibe nguGrant Kekana.
Umdlalo olandelayo we-Sundowns ungomso umhla weshumi elinanye (11) kulenyanga imiyo nalapho bezakube bendwendwele iiRockets eMpumalanga ngoLwesibini ezintsukwini kulo-TS Galaxy kumdlalo we-Betway Premier League, ukhumbule ukuba iGalaxy isandakutywatyusha iChippa United yaseMpuma Kapa nezinze eGqeberha ngenqaku elinye kwiqanda (1-0) kwiBetway Premier League.
Umdlalo olandelayo wePirates uzakuba ngempelaveki ngoMgqibelo umhla weshumi elinesibini (12) e-Orlando ngentsimbi yesithathu (15h00) emva kwemini kwiNdebe yeNedbank kwisigaba samaqela alishumi elinesithandathu (16) ngethuba bezakube bequbisene neqela lebhola ekhatywayo elidlala kwi-Motsepe Foundation League FC.
