Owayesakuba ngumongameli uJacob Zuma utyhola abemi bamanye amazwe ngokungekho mthethweni ngokuhlaselwa kwekhaya likaNgizwe Mchunu, owayelwela amalungelo oluntu ngeMarch and March KwaZulu-Natal.
UMchunu ngokwakhe akaqinisekanga.
Iirondavel ezintathu kwikhaya likaMchunu eMbumbulu, emazantsi eTheku, zatsha zaphela. Kusenjalo ngomhla weshumi (10) kuCanzibe kutyholwa ukuba amadoda amathathu afika kwindawo emfuna, kodwa wayeseRhawutini. Abantwana bakhe babesekhaya. Akukho mntu wonzakeleyo.
UZuma utsalele uMchunu umnxeba waza wamxelela ukuba abemi bamanye amazwe abangekho mthethweni bahlawule abemi basekuhlaleni ukuba benze uhlaselo.
“Aba bantu abanantlonelo kweli lizwe. Benza nantoni na abayifunayo ngaphandle kwemiphumo. Kule meko kuyacaca ukuba basebenzise abemi basekuhlaleni ukutshisa indlu yakho. Banike abemi basekuhlaleni imali ngemisebenzi yabo yolwaphulo-mthetho,” utshilo uZuma.
Ukwakhombe impikiswano ekuqaleni kwalo nyaka malunga nokubekwa kommi waseNigeria njengenkosi yama-Igbo kuGompo eMpuma Koloni. Indoda ephambili kuloo ngxabano, uSolomon Ogbonna Eziko, uxolisile esidlangalaleni waza wathi akazange athweswe isithsaba.
UMchunu akavumelani noZuma okokuba ngubani onoxanduva.
“Akukho mntu wasemzini oza kuza kukhangela indlu yam ukuze ayitshise,” utshilo, ngokwengxelo yeTimesLive. Urhanela ukuba abantu baseMzantsi Afrika abachasene nomngcelele wakhe ngabo abaphembelele uhlaselo.
Olu luhlaselo lwesibini kwinkokeli yomngcelele kwiiveki ezimbini. Ikhaya lomnye umlweli-mkhosi uMthokozisi Gumede eMzimkhulu lonakaliswe kwiiveki ezimbini ezidlulileyo, abahlaseli beqhekeza iingcango neefestile ngelixa bemkhangela. Abantwana bakhe nabo basindile.
Amapolisa aKwaZulu-Natal avule ityala lokutshiswa. Akukho mntu ubotshiweyo.
