Inkosikazi yaseMpuma Koloni ibhubhile nabantwana bayo abathathu abancinci ngexesha kusitsha ikhaya labo, kanti umyeni yena wasinda nomntwana wabo omnye.
Ngokwengxelo yephepha-ndaba i-Independent Online, indlu yabo itshe yaluthuthu besalele.
Esi sehlo senzeke kwilali yaseMbulukweza.
Edlulisa amazwi ovelwano, uMphathiswa wezeMfundo eMpuma Koloni uFundile Gade uthi babini kwabathathu abafundi ababhalise kwisikolo samabanga aphantsi eMzantsi, logama omnye efunda kwisikolo samabanga aphantsi iUpper Mbulukweza, kwilali yaseMbulukweza ngethuba kusenzeka esi sehlo.
Isebe lithi loTata usindile kwesi sihelegu ngaphandle komkrwelo.
“Imithandazo yethu ikusapho, kwaye sinethemba lokuba baya kufumana intuthuzelo kuThixo ngeli xesha lentlungu. Sithumela uvelwano olunzulu nolusuka entliziyweni kolusapho,” utshilo uGade.
Uthe amalungiselelo omngcwabo akakaqinisekiswa.
Isithethi samapolisa eMpuma Koloni uKapteni Namhla Mdleleni uthi amapolisa abizelwe kule ngingqi.
“Ekufikeni kwabo, bafumane amalungu amane osapho. Inkosikazi eneminyaka engamashumi amathathu (30) kunye nabantwana abathathu batshe endlwini.
“Iimeko ezingqonge esi sehlo ziyinxalenye yophando. Uphando lwamapolisa lusaqhubeka,” utshilo uMdleleni.
Amapolisa athi umyeni kunye nosana oluneenyanga ezine ubudala basindile.
Ngenyanga yeThupha kulo nyaka uphelileyo, umama waseMpuma Koloni kunye nentombi yakhe eneminyaka elishumi elinesihlanu ubudala, baphulukana nobomi babo ngokulusizi kumlilo wetyotyombe kwindawo yaseMotherwell, ekukholelwa ukuba wabangelwa likhandlela.
By Siyakholwa Vuso.