By Esona Magawana
Ilungu lebhunga lolawulo lwezothutho eNtshona Koloni u-Isaac Sileku usamkele isigqibo seNkundla ePhakamileyo sokwenza umyalelo wethutyana ojoliswe ekuthinteleni ubundlobongela beeteksi eKapa ngokusisigxina.
Ebutsheni balo nyaka, uSileku uye enkundleni kulandela ungquzulwano oluqhubekayo phakathi kwemibutho ekhuphisanayo yeeteksi iCATA kunye neCODETA malunga neendlela ekhuphisana ngazo phakathi koMfuleni neSomerset West. Ngaphezu kwamalinge okulamla, ubundlobongela buye banda, nto leyo eyakhokelela ekubulaweni kwabantu abaninzi kunye nezisongelo eziqhubekayo kukhuseleko loluntu.
Ngenyanga yeThupha, inkundla yakhupha umyalelo wethutyana onika isebe igunya lokuphumeza amanyathelo angxamisekileyo, aquka ukuvala imizila nerenki, nokunqanda ubundlobongela beeteksi phakathi kwale mibutho. Emva komyalelo wethutyana weNkundla ePhakamileyo, uMphathiswa uSileku ugqibe ekubeni avale iindlela ezichaphazelekayo kangangeentsuku ezingamashumi amathathu (30) kweyoMsintsi, njengoko udushe belusanda phakathi kwemibutho yoonoteksi elwayo. Ngenyanga yeDwarha, inkundla yasichitha isicelo esingxamisekileyo seCODETA sokuchitha oku kuvalwa.
USileku uthi umyalelo wokugqibela wenkundla luloyiso kuye wonke umkhweli ofanele ukuhamba ngokukhuselekileyo nangaphandle koloyiko. “Ubundlobongela nokuchasa umthetho akunandawo kwinkqubo yethu yezothutho. Siza kuqhubeka sisebenzisane nabomthetho kunye nabachaphazelekayo kushishino ukuqinisekisa ukuba amalungelo abakhweli akhuselekile.”
U Sileku uhlabe ikhwelo kwimibutho yeeteksi ukuba ithobele imiqathango yeelayisenisi zokusebenza.
