By Anita Qubula
ISebe loPhuhliso lwamaPhandle noBuyekezo lweMihlaba eMpuma Koloni namhlanje lizakubamba indibano noonondaba malunga nomlilo wamadlelo kutsha nje kweli phondo.
UMasipala wesithili saseAmathole uthi lo mlilo unwenwele ukusuka eCathcart ukuya kutsho eMaqoma. Abalimi beli phondo babala ilahleko yabo equka iinkomo namadlelo.
U-Atule Joka, isithethi sesebe loPhuhliso lwamaPhandle noBuyekezo lweMihlaba eMpuma Koloni uthe, umphathiswa uza kubamba inkomfa noonondaba ukuze athethe ngokwanda kwemililo yamadlelo exhaphakileyo.
UMphathiswa uyothuswa kukunwenwa ngokukhawuleza kwale mililo kwaye ulumkisa ukuba ukuqala imililo kwiindawo ezivulekileyo ngaphandle kwemvume evela kwimibutho yasekuhlaleni yokukhusela umlilo lityala lolwaphulo-mthetho. Isebe lixakene nezicelo zokucela uncedo kumafama achatshazelwe yile mililo iqhubekayo.
Ekhatshwa ziingcaphephe kwezolimo, uMphathiswa uza kunika ingxelo eneenkcukacha aze achaze izicwangciso zongenelelo zesebe.