ULeon Schreiber weSebe leMicimbi yezeKhaya ufuna abemi boMzantsi Afrika baziyeke iincwadi zabo zezazisi ezindala neziluhlaza baze batshintshele kumakhadi ezazisi.
Iphephandaba i-The SouthAfrican lithi uMphathiswa weMicimbi yezeKhaya uLeon Schreiber ukhuphe isilumkiso esiqatha kubemi boMzantsi Afrika, esithi abemi beli lizwe basengozini enkulu yobuqhophololo nobusela ukuba abatshintsheli kwikhadi lesazisi (ID).
“Uphando lucebisa ukuba incwadi yeSazisi eluhlaza yoMzantsi Afrika yeyona ilula kakhulu ukwenza ubuqhophololo ngayo eAfrika, kwaye ubusela bezazisi buxhaphaza ilizwe lethu kwi-R1.5 bhiliyoni ngonyaka.
“Ukuba ufuna ukulwa ubuqhophololo norhwaphilizo ngelixa ukhusela usapho lwakho, tshintshela kwikhadi lesazisi phambi kokuba izikrelemnqa zibube ubomi bakho,” ubhale watsho uSchreiber ku-X (owayefudula enguTwitter) emva kwemini ngoMvulo.
Isilumkiso sikaSchreiber siza ngenxa yokubhangisa izazisi (ID) zesebe ezithathwa njengezobuqhophololo.
NgoLwesihlanu weveki ephelileyo, iSebe lezeKhaya libhengeze ukuba lizakuvala izazisi, libongoza abemi boMzantsi Afrika ukuba banike izizathu zingaphelanga iintsuku ezingamashumi amathathu zokuba kutheni zingacinywa umphelo.
“Ngeli nyathelo, iSebe lezeKhaya lijolise ekusombululeni zombini umba osele uneminyaka ukho wokuvalwa kwezazisi ngempazamo ngelixa kuphungulwa inani lamaxwebhu anobuqhophololo asasazwayo.
USchreiber ebekwiphulo elibukhali lokucoca iMicimbi yezeKhaya ukusukela oko wathi waqeshwa njengomphathiswa njengenxalenye kaMongameli uCyril Ramaphosa obizwa ngokuba ngurhulumente wobumbano lwesizwe.