By Siphiwo Boqwana.
IOrlando Pirates ingqinile ukuba uMonapule Saleng ibolekise ngaye kwiqela elitsha elisandokonyuselwa iOrbit College, ekwaliqela aweyesakulidlalela uSaleng. Ezimnyama ngenkani zikhulule noPhiliph Ndlondlo ngokupheleleyo.
USaleng oneminyaka engamashumi amabini anesixhenxe ubudala (27) kulindeleke ukuba adlale unyaka kweliqela.
Ngokuqinisekileyo abalandeni bezimnyama ngenkani bazakumjonga uMonapule indlela azakuqhuba ngayo kweliqela. I-Orbit College FC nayo kwelayo icala iyakuvuya xa uSaleng enokwenza kakuhle kuba uyakulinceda eli qela nangamava anawo.
IPirates sele ityikitye abadlali abalishumi (10) kunjalo nje sele ibhengeze ukuhamba kwabadlali abafana noPaseka Mako, uThabiso Monyane, uMiguel Tim noInnocent Maela.
UMonapule uqale kwiOrbit College phambi kokuba aye kwiFree State Stars emva koko watyikitywa ngezimnyama ngenkani nalapho abe yinto ngobunto bayo ezibonakalisa ukuba uphethe ntoni kwisakhono sebhola ekhatywayo.
Kuphelile ukuxoxa ngoku _ngentsind’ abadala_ yomrholo ongaginyisi mathe kaSaleng kwibhakabhaka. USaleng wagqibela ukudlala kwiPirates ngenyanga yoMnga ka2024 kunyaka ophelileyo ngethuba bedlala neAhl Ahly yaseJiphethe kudlalelwa kumabala aseOrlando eSoweto, kwiCAF Champions League.
Kwelinye icala iPirates ithe ndlelantle kuPhilip Ndlondlo odlala esiswini nongumdlali obedlala kakuhle kweliqela, nto nje kwafika uTalente Mbatha ofike wamgqumelela kwatsho kwaphela ngaye.