UMongameli uCyril Ramaphosa uthi akukabikho sidingo sokungxama okwangoku ukuthumela oonozakuzaku eMelika ukuze balungise iimbono ezigwenxa kunye nobuxoki malunga nelizwe lethu.
Uthi uMzantsi Afrika usayithatha iMelika njengeqabane elinobuchule borhwebo – nayo ekusenokwenzeka ukuba iphulukane nayo ngakwisivumelwano sorhwebo esikhethekileyo namazwe ase-Afrika phantsi koMthetho woHlumo namaThuba e-Afrika (i-AGOA).
Ephendula imibuzo kwiNdlu yoWiso-mthetho ngoLwesibini, uRamaphosa uthe urhulumente uthatha izigqibo zolawulo lukaTrump njengentengiselwano.
“Siyayifumana inkxaso kwi-AGOA, kodwa nathi sinalo igalelo phaya. Siyarhweba namazwe angaphandle ngokuthumela impahla, siphinde siyingenise nathi impahla esuka eMelika. Le yinkqubo yenika-nika, njengoko kunjalo nakwamanye amazwe amaninzi kwihlabathi liphela. Njengokuba kunjalo ngoku, siyaqhubeka, hayi nje ngokulindela inyathelo le-AGOA, kodwa siyaqhubeka nokwandisa iimarike zethu zokuthumela ngaphandle.”
URamaphosa uthi ekuhambeni kwexesha urhulumente uzakuthumela abameli bakhe ukuba baye kuthethathethana neMelika phantsi kwerubrikhi yomgaqo-nkqubo wayo wezangaphandle – hayi ngemibutho efana ne-AfriForum ne-Solidarity, imibutho athi yimibutho yabantu abangengomathandazwe oMzantsi Afrika esasaza ulwazi olungachanekanga.
“Abanye abantu abahamba besiya ngapha nangapha ekugqibeleni abawumeli uMzantsi Afrika, uMzantsi Afrika umelwe sisigqeba soMzantsi Afrika.
“Qiniseka ukuba sizakuyilandelela. Umyalelo esinawo ngokomgaqo-siseko wethu kukuqinisekisa ukuba esikwenzayo ngokunxulumene namanye amazwe, kuyawuqhubela phambili umdla woMzantsi Afrika,” utshilo ummi wokuqala.
