NgoMvulo umhla wamashumi amabini (20) kuCanzibe, inkundla yoMgaqo-Siseko iwise isigwebo sayo kwisibheno se-IEC esichasene nomyalelo wenkundla yolonyulo malunga nokungenela ugqatso lowayesakuba ngumongameli uJacob Zuma.
INkundla ephakamileyo imamele iingxoxo ebutsheni bale nyanga malunga nokutolikwa okuchanekileyo kweCandelo 47(1)(E) loMgaqo-Siseko – elilawula ukuba ngubani ofanele ukuba lilungu leNdlu yoWiso-Mthetho.
Ityala le-IEC lijonge ukuzisa isiphelo kwingcaciso echanekileyo nokuba iyasebenza na kowayesakuba ngumongameli uZuma, nowaagwetywa iinyanga ezilishumi elinesihlanu (15) entolongweni ngenxa yokudelela kwale nkundla inye.
Ngokwengxelo lephepha-ndaba i-Independent Online, umhlalutyi wezopolitiko uNjingalwazi Sipho Seepe uthe, owayesakuba ngumongameli uJacob Zuma angalandela umkhondo ofana nokasihlalo weDA uHelen Zille, wokuba ngaphandle kwepalamente kodwa aqhubeke ngokuba nefuthe kumbutho woMkhonto weSizwe (MK).
UJabulani Khumalo, obanga ukuba iqela loMkhonto weSizwe laabhaliswa nguye ufuna inkundla ikubhengeze ukuba akukho semthethweni ukubhaliswa kwekomishini ngoJacob Zuma njengenkokeli yombutho.
NgokukaKhumalo, inkundla kufuneka inyanzelise ikomishini ukuba ibhalise yena njengenkokheli yeqela leMK.
UKhumalo, osanda kugxothwa kulo mbutho, ubhalele i-IEC ebutsheni bale nyanga ukuba asuswe uZuma njengobuso beqela iMK. I-IEC, kwingxelo, ithe ayizibandakanyi kwimicimbi yangaphakathi yemibutho yezopolitiko yaphinda yaqinisekisa ukuba inkokeli ebhalisiweyo yeMK Party nguZuma.
By Anita Qubula.
