UMphathiswa weSebe leNtsebenziswano kuRhulumento neMicimbi yeMveli eMpuma Koloni, uZolile Williams, umemelele oomasipala kwimimandla engaselunxwemeni ukuba bathathe amanyathelo okhuseleko kulandela isilumkiso senqanaba lesi-6 esikhutshwe yiNkonzo yeMozulu yoMzantsi Afrika ngokuphazamiseka kwemvula kwakunye nezikhukhula ezinokubakho.
Isithethi sikaMphathiswa uPheello Oliphant ubongoze uluntu oluhlala ngaselunxwemeni, ingakumbi kwimimandla efana nePort St Johns, Mbashe, Buffalo City, Ndlambe, Coega, neNelson Mandela Bay, ukuba bahlale bephaphile.
UMphathiswa ucebise abahlali ingakumbi abafundi bebanga leshumi abahlalele iimviwo ukuba bahlale bekhuselekile kwaye balumke. Amaqela olawulo lweentlekele abeka esweni iindawo ezithandwa zizikhukula.
