Iphulo lokulwa nokuqhuba unxilile elikhokelwa ngamagosa endlela angabasetyhini likhokelele ekubanjweni kwabaqhubi abalishumi elinesithoba (19) abatyholwa ngokuba ngabaqhubi abanxilileyo eMaletswai.
Le nkqubo ijolise ekuqaliseni iphulo lokhuseleko ezindleleni lephondo elithathe inyanga yonke eliqaliswe liSebe lezoThutho laseMpuma Koloni kwiSithili saseJoe Gqabi ukuphawula iNyanga yaBasetyhini.
Le nkqubo iqale ngemfundo yokhuseleko ezindleleni emini ngoMgqibelo umhla umhla wokuqala (1) kweyeThupha, ngaphambi kokuba itshintshele kumsebenzi wokunyanzeliswa komthetho ngobusuku obunye.
UMphathiswa wezoThutho eMpuma Koloni, uXolile Nqatha, uncome amagosa ngobuchule bawo, ukuzinikela, kunye nendlela engqongqo yokugcina iindlela zasekuhlaleni zikhuselekile.
“Abafazi beSebe lezoThutho laseMpuma Koloni bathumele umyalezo onamandla wokuba ukhuseleko ezindleleni alunazo izini. Lufuna ukuzinikela, ubuchule, kunye nesibindi,” utshilo uNqatha.
“Isenzo sabo esiqatha ekususeni abaqhubi abatyholwa ngokuba ngabaqhubi abanxilileyo ezindleleni zethu sisikhumbuzo sokuba ubomi bonke bubalulekile,” utshilo.
Isebe liqinisekisile ukuba le nkqubo yayikukuqala nje kweenkqubo zalo zeNyanga yaBasetyhini.
Imisebenzi efanayo yokunyanzeliswa komthetho yabasetyhini kunye neephulo zokhuseleko ezindleleni zicwangciselwe ukuqalisa kuzo zonke iingingqi zaseMpuma Koloni kulenyanga yeThupha