Iphulo elidibeneyo lamapolisa nomkhosi kumbindi waseGqeberha ngoMvulo likhokelele ekubanjweni kwabemi bamanye amazwe abangamashumi asixhenxe anesithandathu (76) abangenazo iimpepha kunye nabanye abarhanelwa abathathu (3).
Ukubanjwa kwenziwe njengenxalenye yokuthunyelwa komsebenzi oqhubekayo ngomhla wamashumi amathathu (30) kweyeSilimela.
Ngelixa babeqhuba imisebenzi yokujikeleza kumbindi-sixeko, amajoni aqaphele imisebenzi ekrokrisayo kwindawo yokuhlala eHavelock Street aza axelela amapolisa ngoko nangoko.
Amapolisa aphendule aza afumanisa abantu bamanye amazwe abangamashumi asixhenxe anesithandathu (76) abangenazo iimpepha, kuquka nabantwana abasixhenxe (7). Babanjwe ngokwaphula uMthetho wokuFudukela kwaye baqhutywa ngokwemigaqo esemthethweni neyokufudukela.
Isithethi samapolisa uKapteni uSandra Janse van Rensburg uthe abarhanelwa abathathu nabo babanjwe ngezityholo zokunceda nokukhuthaza abantu bamanye amazwe abangenazo iimpepha;
– ukusasazwa kwamaxwebhu obuqhetseba; kunye
– nokuba neempahla zomgunyathi.
Igosa elibambeleyo lesithili saseNelson Mandela Bay uBrig Loyiso Ngalo uthe eli phulo libonise intsebenziswano eqinileyo phakathi kweearhente zogcino-mthetho ekulweni nokufuduka okungekho mthethweni kunye nemisebenzi yolwaphulo-mthetho enxulumene noko.
“Siza kuqhubeka nokuqinisa imisebenzi eqhutywa bubukrelekrele ukuqinisekisa ukuba abo baququzelela ulwaphulo-mthetho bayabanjwa ngelixa begcina indawo ekhuselekileyo kubo bonke abemi,” utshilo uNgalo.
Bonke abarhanelwa ababanjiweyo kulindeleke ukuba bavele kwinkundla kamantyi yaseGqeberha emva kokuba bemangalelwe ngokusesikweni.
