By Siphiwo Boqwana
Ukuqala ngoLwesibini umhla wamashumi amabini anesine (24) kulenyanga yamasiko nezithethe kanye ngosuku lweholide lokubhiyozela ukuzingca kweentlanga ezohlukeneyo eMzantsi Afrika nayizolo umhla wamashumi amabini anesihlanu (25) ngoLwesithathu kulenyanga yoMsintsi bekudlalwa imidlalo yeBetway Premier League.
Iqela lebhola ekhatywayo laseSoweto iOrlando Pirates ibhaxabule ngamanqaku amathathu kwiqanda (3-0) iqela iPolokwane City kumabala aseOrlando eSoweto emva kokubambana ngeqanda (0-0) kwisiqingatha sokuqala (1). Omathathu (3) amanqaku iPirates iwafumene kwisiqingatha sesibini (2) nalapho uMonnapule Saleng efake elokuqala (1) aze amanquku amamabini (2) afakwa nguEvidence Makgopa ongene endaweni kaMonnapule kwisiqingatha sesibini (2).
IMamelodi Sundowns yona khange iyiqhelisele iMarumo Gallants ngethuba iyithwaxa ngamanqaku amane kwelinye (4-1), kwelinye icala iSekhukhune United ibambene ngenqaku macala (1-1) neChippa United kowayo, iiChilli Boys neqeqeshwa nguKwanele Kopo bezidlala kakuhle kakhulu ziwuphethe umdlalo kwisiqingatha sokuqala somdlalo ngethuba uEva Nga ebhalisa inqaku kumzuzu wesixhenxe. Lo mdlalo ubudlalelwa kumabala iPeter Mokaba.
Owayesakudlalela iOrlando Pirates uThabang Monare ufake inqaku lakhe lokuqala kwiBabina Noko kwisiqingatha sesibini kumzuzu wamashumi amane anethoba atsho alingana lamaqela ngelinye macala (1-1) emva kokunqenqeza phambili kweChippa ngenqaku elinye eqandeni (1-0) kwisiqingatha sokuqala somdlalo.
Iqela likaLehlohonolo Seema likwindawo yesithandathu ngoku ngelixa iiChilli Boys zime kwindawo yesixhenxe.
Izolo iMagesi engabatshakazi bePSL ibethe iGolden Arrows kowayo eThekwini ngethuba iyibetha ngenqaku elinye kwiqanda (1-0), nguWonderboy Makhubo ofake inqaku leMagesi kumzuzu wamashumi asixhenxe anethoba kumdlalo ochithwe ngenxa yombane, iPSL kulindeleke inike ingxelo yokuba kuzakwenzeka ntoni ngalomdlalo. Kanti yona iSupersport United izibethele iqela leTS Galaxy ngenqaku elinye kwiqanda (1-0) ePitoli kumabala iTUT, Amatsantsantsa aPitoli ebeqala ukuphumelela kulesizini njengeMagesi phezolo.
NguTerrence Dzvukamanje ofake inqaku lempumelelo yeSupersport kumzuzu wamashumi amathandathu anesithathu kwisiqingatha sesibini. Emva kwalomdlalo iSupersport inyuke yayokutsho kwindawo yethoba kuluhlu lamaqela ePSL kwiBetway Premier yona iTS Galaxy engekaphumeleli ikwindawo yeshumi elinesine.
EThekwini Amazulu adibene neKaizer Chiefs icaphukile isemsindweni phantsi komqeqeshi wayo omtsha uNabi nalapho bewabethele kowayo Amazulu ngethuba bewatywatyusha ngamanqaku amathathu kwelinye (3-1). Umdlali omtsha nosuka kwiSundowns uGaston Sirino ubhalise inqaku nomnye umdlali odlala ngasemva uMiguel waseAngola.
IStellenbosch FC siyibethele oogqirha nezicaka zayo iCape Town City ngamanqaku amathathu eqandeni (3-0).
UFawaaz Basadien, uAsenele Barns bafake inqaku umdlali ngamnye noAndre de Jong ofake inqaku lakhe lesibini kulesizini kwiStellies. IiCitizens zikwindawo yeshumi elinesithathu ize iStellies sibe kwindawo yeshumi emva komdlalo wazo.
By Siphiwo Boqwana
