Emva kokugxothwa kwabantu abaninzi bamanye amazwe abangenazo iimpepha kwiinyanga ezimbini ezidlulileyo, i-Border Management Authority (BMA) ithe ngoku ijongene nomceli mngeni wokuthintela ukubuya kwabo kumgca womda.
Ngeli xesha, i-BMA ibambe abantu abangaphezu kwamawaka amane (4,000) abaye bazama ukungena kweli lizwe ngaphandle kwamaxwebhu asemthethweni avela kwimida yaseZimbabwe, iLesotho neMozambique.
Ukomishinala we-BMA uMichael Masiapato uxelele iKomiti yezeKhaya yePalamente ngoLwesibini umhla weshumi elinanye (11) kweyeThupha ukuba eli gunya likwajolise kubaququzeleli abanceda abantu ukuba bangene kweli lizwe ngokungekho mthethweni, beququzelela ukugxothwa kwabantu abangamawaka alishumi (10,000) ngenxa yoko.
Emva kokuphuma kwabantu bamanye amazwe abamalunga namashumi asithoba amawaka (90,000) abangenazo iimpepha kwiinyanga ezintathu ezidlulileyo, i-BMA ithe ngoku ikhusela eminye imida esengozini efana neyaseMntla Koloni.
Kodwa uMichael Masiapato we-BMA uthe nangona kubuyiselwe abantu abaninzi kutshanje, ayibathinteli abantu bamanye amazwe ekuzameni ukuphinda bangene kweli lizwe phakathi komhla wokuqala (1) kuTshazimpuzi nomhla wamashumi amathathu ananye (31) kweyeKhala.
“Sikwazile ukubamba abantu abangaphezu kwamawaka amane anamakhulu amabini namashumi amabini anesithoba (4,229) ababengenazo iimpepha ababezama ukungena kweli lizwe ngokungekho mthethweni.”
UMasiapato uthe i-BMA ngoku inyanzelisa amanyathelo angqongqo okungena, kuquka ukuba abo bahamba ngee-visa zeendwendwe banike idilesi yokuhlala kunye nobungqina bemali yokuhlala kwabo.
“Ukuba abakwazi ukubonakalisa ngokucacileyo injongo yotyelelo lwabo, ngoku, nokuba ngamazibuko omhlaba, singqongqo ngakumbi. Yiyo loo nto kukho abantu abangaphezu kweshumi elinesibini lamawaka (12,000) abangazange bavunyelwe ukungena kwiinyanga ezintathu nje kuphela.”
Uthe abantu abangaphezu kwamawaka amahlanu (5,000) abaye bahlala ixesha elide kwii-visa zabo baye babhengezwa njengabangafunwayo.
