By Siphiwo Boqwana
Alixolanga iqela lebhola ekhatywayo laseMpuma Kapa nelizinze eGqeberha kuMasipala iNelson Mandela Bay elidlala kwiBetway Premiership iChippa United emva kokurhoxiswa komdlalo wayo neqela lebhola ekhatywayo elisezingxakini zemali iRoyal AM. Oku kulandela emva kokuba umbutho weligi kwibhola ekhatywayo eMzantsi Afrika iPremier Soccer League irhoxise umdlalo ngaphandle kokwazisa eliqela laseMpuma Kapa nebelizakuba ngabahlinzeki.
IiChilli Boys beziza kuhlinzeka lo mdlalo ngoMgqibelo umhla weshumi elinanye (11) kulenyanga yoMqungu ngomkhono phambi kwentsimbi yesithandathu (17h45) kumabala iNelson Mandela Bay eGqeberha. Lo mdlalo wangoMgqibelo ibizakuba ngumdlalo wayo wokuqala kulonyaka, iChippa igqibele ukudlala kunyaka ophelileyo ngethuba ibethwa yiKaizer Chiefs ngenqaku elinye kwiqanda (1-0) ngomhla wamashumi amabini anethoba kwinyanga yoMnga.
IChippa yenze utshintsho emva komdlalo wayo neChiefs kubaqeqeshi, emva kokuphela kwesivumelwano sengqesho neliqela leeChilli Boys owayesakuba ngumqeqeshi uKwanele Kopo ulishiyile eliqela engavumi kwaphela ukutyikitya esitsha isivumelwano sengqesho.
USiviwe Mpengesi ongumnini weliqela lebhola ekhatywayo laseMpuma Kapa uye wonyusela uThabo September ukuba abe ngumqeqeshi waze waqesha uMabhuti Khanyeza njengosekela mqeqeshi emva kokuflathela iqela lakhe iLamontville Golden Arrows nalapho ebesakuba ngumqeqeshi khona.
IChippa United ibhengeze kubalandeli bayo ukuba umdlalo urhoxisiwe bangawathengi amatikiti de baphinde baziswe, icele noxolo iChippa kubalandeli bayo nababezimisele ukuya kulomdlalo.
Eli qela lakwiphondo leMpuna Kapa nelizinze eGqeberha livakalise ukungaxoli kukungaxelelwa ngokurhoxiswa kwalomdlalo webhola ekhatywayo weBetway Premier League nobuzakuba ngoMgqibelo umhla weshumi elinanye (11) kulenyanga yoMqungu eGqeberha kumabala iNelson Mandela Bay ngomkhono phambi kwentsimbi yesithandathu (17h45) malanga.
IRoyal AM ifumene ingxaki enkulu emva kokuba abadlali bayo bengakwazanga ukuphumelela ekuzilolongeni bekhalazela ukungahlawulwa imivuzo iinyanga eziliqela.