UMbutho we-African National Congress (ANC) uthi awunakuqinisekisa okanye ukukhanyela ukuba usazama ukugaya umbutho we-Economic Freedom Fighters (EFF) uMbuyiseni Ndlozi.
Iphephandaba iMail and Guardian kutshanje likhuphe ingxelo yokuba iANC eFreyistata ibithetha noNdlozi ukuba atsibe kulanqanawe kaMalema.
Kutshanje uNdlozi uye warhoxa njengelungu le-EFF ePalamente emva kokuba ephulukene nesihlalo sakhe kwiqela labaphathi bombutho.
UNobhala Jikelele we-ANC, uFikile Mbalula, nesebe lakhe eFreyistata, uthe uNdlozi uzakwamkeleka kuwo nawuphi na umbutho wezopolitiko.
“Malunga noMbuyiseni, ingaba sithetha naye?! Andazi, inokwenzeka, nguye naye kuphela onokuzithethelela kodwa andinokothuka xa i-ANC inothetha naye kuba ulilungu elilungileyo, eli nobuntu, kwaye kummandla wezopolitiko, ungumpolitiki olungileyo ngoko kutheni singazuthetha naye.”
UMbalula uthe uNdlozi uphethwe kakubi yi-EFF.
“Xa iqela lakhe limkhupha ngolo hlobo, uvele umkhabe umntu ofana noMbuyiseni, lo nto ithetha ukuthi uJulius [Malema] unamandla, kwaye uzithembe kakhulu, unamandla kwaye ukuba ucinga ukuba ibhotwe leglasi elifana noMbuyiseni lingavele ligxothwe ngolohlobo, akukho nto imbi ke kumalungu e-ANC nakubani na phofu, ukuba bathethe noMbuyiseni.
“Ukuba uyawushiya umbutho wakhe, kutheni kungathethwa naye azibandakanye ne-ANC kwaye abe negalelo kumbutho wezopolitiko weli loMzantsi Afrika? Ukuba uthatha isigqibo sokuba ngusopolitiki kwaye ufuna ukuhlala kwezopolitiko kwaye alandele i-ajenda yenguqu, inkululeko yabantu bethu, thina kwi-ANC sivulelekile kuloo nto, angafika.”