By Nyameka Lamani.
INtloko yeCandelo lezoMthetho kwiNkonzo yamaPolisa oMzantsi Afrika (SAPS), uNjengele Petronella van Rooyen, uthi uMphathiswa wamaPolisa uSenzo Mchunu akanalo igunya lokukhupha umyalelo wokuba kuchithwe iqela elijongene nokubulawa kwabantu bezopolitiko KwaZulu-Natal (PKTT).
UVan Rooyen unike ubungqina phambi kweKomishoni yoPhando kaMadlanga ePitoli.
Uthe iqela lokubulawa kwabezopolitiko luphantsi komsebenzi wamihla le wamapolisa, msebenzi lowo uluxanduva lukaMkomishinala wamaPolisa kuZwelonke.
Ekuqaleni kwale veki, uMkomishinala wamaPolisa kuzwelonke uFanie Masemola uchaze indima noxanduva lwakhe ngokuchaseneyo nezo zikaMphathiswa wamaPolisa.
Ngokuhambelana noMgaqo-siseko kunye noMthetho we-SAPS, umkomishinala wamapolisa kuzwelonke unoxanduva lwemicimbi yokusebenza, ngelixa umphathiswa wamapolisa enoxanduva lokujongwa kwezopolitiko, umgaqo-nkqubo kunye nobume bomthetho.
UMasemola uxoxe ngelithi umyalelo kaMchunu wokuba kuchithwe i-PKTT yaseKZN wawungekho phantsi kwesigunyaziso sakhe.
Ngethuba enikela ubungqina kwiKomishoni kaMadlanga ngentsasa yangoLwesine, uVan Rooyen ungqinele uMasemola, esithi ileta kaMchunu ngokucacileyo ibingumyalelo onxulumene nemicimbi yemisebenzi yemihla ngemihla.
“Ngaba umphathiswa wayenalo igunya lokuyalela ukuba kuvalwe igqiza elaliphanda ubugebenga? Ngokokubona kwam wayengenalo elo gunya.”
UVan Rooyen kulindeleke ukuba athethe nezomthetho malunga nokwabiwa ngokutsha kwamadokethi ali-121 asuka kwi-PKTT yaseKZN kundlunkulu wamapolisa ePitoli.