Impendulo ekhawulezileyo evela kwinkonzo yamaPolisa ikhokhelele ekubanjweni koonqevu abane, ukuthathwa kwempahla ebiweyo kunye nompu ongenampepha-mvume kwimizuzu emva kokuphangwa kweshishini eGqeberha.
Oku kulandela emva kokuphangwa kweshishini okwenzeke ngoLwesithathu, umhla wamashumi amabini anesithathu (23) kweyeKhala, malunga nentsimbi yeshumu elinanye (11:00), ngethuba amadoda amabini (2) angaziwayo engena kwivenkile ethengisa izinto engaphakathi ePier 14 kudederhu lweevenkile eGovan Mbeki Avenue, eNorth End, eGqeberha. Omnye wabarhanelwa ubonise umpu ngelixa omnye enehamile waqhubeleka nokuphanga ivenkile. Emva koko baqhekeza ikhabhathi ebonisa ngelasi bathatha iilaptop, iiselfowuni, neekhamera kwixabiso eliqikelelwa kwikhulu lamawaka (R100 000). Ngethuba kuphangwa kule venkile, badibene nabanye abarhanelwa abathathu (3) ngaphandle, babaleka ngemoto yohlobo lweToyota Corolla emhlophe. .
Malunga nemizuzu elishumi elinesihlanu emva koko, amalungu aphantsi kweProvincial Organised Crime Investigation Unit alandele umkhondo wesithuthi aze ayibona eSt Leonards Road, eAlgoa Park aza abamba ngoko nangoko abarhanelwa abane (4) abangamadoda aphakathi kweminyaka engamashumi amabini (20) ukuya kumashumi amane (40) ubudala. Aze afumana iiselfowuni ezingamashumi amathathu anesixhenxe(37), iilaptops ezilishumi elinesihlanu (15) neekhamera ezintathu (3). Uphando olunzulu lukhokelele amapolisa ekufumaneni umpu ongenalayisenisi (i-7.65 mm pistol) kunye nompu oyikopi.
Amapolisa aphanda amatyala okukhuthuza amashishini, ukuba nezinto ezibiweyo, nokuba nemipu ngaphandle kwempepha-mvume.
Aba barhanelwa bazakuvela kwinkundla kamantyi yaseBhayi ngomso umhla wamashumi amabini anesihlanu (25) kweyeKhala.
