Amapolisa eMpuma Koloni ayaqhubeka neenzame zawo zokuthintela ukukhuthuzwa kweemoto ezithutha imali kwakunye nokugqugqisa kwemipu engekho mthethweni kweli phondo. Kwiveki ephelileyo, imipu engamashumi amathathu anesithathu (33) ithinjwe kweli phondo. Iinzame ezilungelelanisiweyo zibonise ukuzinikela kwamagosa asebupoliseni ekulweni ukwanda kwemipu engekho mthethweni, nto leyo edla ngokukhokelela kulwaphulo-mthetho olumandundu nobundlobongela eluntwini.
KwiSithili sase-OR Tambo, ngoLwesibini, umhla wamashumi amabini anesithathu (23) kweyeKhala, i-Tactical Response Team (TRT) eMthatha iphumeze isigunyaziso sokugqogqa umzi oseUpper Ngqwarha, eMqanduli ngethuba ilandela ulwazi malunga nophango lemoto yemali olwenziwe eMqanduli ngoLwesihlanu umhla wesihlanu (05) kweyeKhala ka-2024. Kubhaqwe ityendyana lomfana elineminyaka engamashumi amathathu anesibini (32) nompu we-Uzi oneembumbulu. Uvalelwe ngesityholo sokuba nompu ongavumelekanga nokuba neembumbulu ezingekho mthethweni. Uphando lokuqala ludize ukuba lo mpu webiwa kwinkampani yonogada yabucala eMqanduli kwiminyaka engaphezu kwemithathu eyadlulayo (Februwari 2021).
Eqhubeka exhentsiswa ngemibuzo umrhanelwa, ukhokelele amapolisa kwikhaya elikwilali yaseMpunzana, eMthatha, nalapho kufunyenwe khona imoto yohlobo lweToyota Corolla engwevu ipakishwe egaraji. Le moto yayanyaniswa nokuphanga ishishini eSterkspruit kule nyanga. Le ndoda kulindeleke ukuba ivele phambi kwenkundla kungekudala ngezityholo zokuba nompu ongenampepha kunye nokuba neembumbulu ezingekho mthethweni. Umrhanelwa kulindeleke ukuba kamva abekwe ityala lokuphanga isithuthi semali, ukuzama ukubulala kunye nokonakalisa impahla.
Umpu uya kuthunyelwa kwi-ballistics ukuze uhlaziywe, ngelixa isithuthi sivalelwe ukuze kuphandwe ngakumbi.
UMkomishinala wePhondo uNjengele Nomthetheleli Mene ukwamkele ukubanjwa nokufunyanwa kwabo. “Iqela elimiselweyo le-CIT elisekiweyo elibandakanya amalungu aphantsi kwe-TRT, i-DPCI kunye neqela lokulandela umkhondo lisabela ngokukhawuleza kwimingeni yolwaphulo-mthetho olucwangcisiweyo kwiphondo, kwaye libonisa ukuzinikela okungagungqiyo ekujonganeni nokukhuthuzwa kwe-CIT. Amapolisa azakuhlala ezimisele ukujongana nabaphuli mthetho,” wongeze watsho uNjengele Mene
