By Ongeziwe Ntondini.
UNogada weNkampani i-G4S oneminyaka engamashumi amane (40) ubudala kulindeleke avele eNkundleni yamatyala yaseSajonisi namhlanje umhla wesithathu (03) kweyoMdumba 2025 ngetyala lokuxhomisa isithuthi nokuphanga.
Lo nqevu kuvakala ukuba uqeshwe nguG4S Cash Solutions eRhawutini. Ubanjwe ngoMgqibelo ngamacandelo amapolisa ohlukeneyo aquka ii-Hawks eMthatha, Tactical Response Team (TRT), Port St Johns Crime Prevention kunye ne-Port St Johns Crime Intelligence.
ISithethi se-Hawks uWarrant Officer Ndiphiwe Mhlakuvana uthi oonogada ababini bakwaG4S bebehamba ngesithuthi esiluhlobo lwe-Toyota Etios kufuphi naseNtlaza eLibode behamba belungisa imitshini yakwaCapitec ekhupha imali (ATMs).
INgxelo iqhuba ithi isithuthi sabo singqutywe sisithuthi esiluhlobo lwePolo, oonogada bemisa ukujonga umonakalo. Ngephanyazo kumise isithuthi esiluhlobo lweToyota Fortuner ekungacaci sivele phi. Kwehlike kuso amadoda axhobileyo anyanzelise oonogada ukuba balale phantsi baphanga imipu yabo.
INgxelo yamaPolisa ityhola ukuba isithuthi sakwa-G4S esiluhlobo lwe-Etios sifunyenwe kwakule dolophu sinabakhweli ababini abathe xa bebona amapolisa babaleka ngesithuthi eso.
Kuvakala ukuba kumgama ongephi bashiye isithuthi babaleka. Bathe baleqwa ngeenyawo wabanjwa umrhanelwa omnye.
Basagcwele amathafa abanye abarhanelwa kodwa uphando lwamapolisa luyaqhuba.
