By Lilitha Phenduka.
Abahlali batyhola ukuba amapolisa ayasilela ekulweni nabophuli-mthetho bangenene.
Ngokwengxelo zikanomathotholo i-Algoa FM balishumi elinesithandathu (16) abahlali abavele kwinkundla kaMantyi yaseMonti ngoLwesine, umhla wamashumi amabini anesixhenxe (27) kweyoMdumba 2025, malunga nokubulawa kwamadoda amathathu aseNxarhuni.
Eli tyala lisukela ekubulaweni kukaVuyiswa Molly Jikajika, owabulawa ngethuba kuqhekezwa umzi ngoLwesibini weveki ephelileyo.
UJikajika, olilungu elithandekayo kuluntu lwaseMonti, usebenze njengoweyitala (waitress) eBeach Break Café eNahoon Beach kule minyaka ingamashumi amabini anesibhozo (28) edlulileyo.
Ngaphandle kwenkundla, uluntu olunomsindo luqhankqalaze noxwebhu lwezikhalazo olutyikityiweyo, lunyanzelisa ukuba abarhanelwa banikwe ibheyile yasimahla.
Ilungu lasekuhlaleni uMakaziwe Tsheme uthi amapolisa oyisakele ukubamba abo batyholwa ngokubulala uMolly ngoMvulo emva kokuba bezityande igila ngokubulala.
UTsheme uthi abahlali abalishumi elinesihlanu (15) babanjwe ngoMvulo kulandela ukubulawa kwala madoda mathathu, ngelixa elinye ixhegwazana belityhola limsulwa libanjwe ngoLwesine ekhayeni lalo.
UTsheme uvakalise ukungoneliseki ngamapolisa esithi amapolisa akayenzanga indima yawo, koko alandela kuphela ityala lamalungu oluntu agqibe kwelokuba azimele afumane abenzi bobubi. Wongeze ngelithi iveki iphelile kubulewe uJikajika, kwaye bebengeva nto emapoliseni.
USolomzi Ntenteni wakwaNompumelelo apho uMolly ebehleli khona phambi kokuba afuduke, uthi ucela kukhululwe abarhanelwa abalishumi elinesithandathu (16) okanye kubanjwe uluntu lonke nanjengoko aba bavalelweyo bebengenzi nto bodwa.
Emva kokuvela kwabo, ityala elijongene nabarhanelwa liye larhoxiswa laze lamiswa de kuphinde kubhengezwe elinye ixesha, kungakhange kubekwe umhla wokuvela kwakhona.
UNtenteni uvakalise ukungoneliseki sisiphumo ediza ukuba abasolwa abanatyala.
