IsiCwangciso soTyalo-mali seNguqu kuMandla weminyaka emihlanu ukusuka ku-2023 ukuya kowama-2027 siza kufuna i-$98 yeebhiliyoni nto leyo ethatha ukuba yi-R1.7 yetriliyoni kwimali yeli, ukuba uMzantsi Afrika uza kuphumeza izibophelelo zawo zokususa i-carbonisation ngo-2050, utshilo umongameli uCyril upRamaphosa.
URamaphosa ebethetha kwiNgqungquthela yokumelana neMozulu ePitoli ngoMvulo umhla wamashumi amabini anesibini (22) kweyeKhala nalapho athe esi sicwangciso siza kuqhuba utyalo-mali olukhulu kwiziko lombane, izithuthi zombane, ukwahluka kwezoqoqosho kunye nophuhliso lwezakhono.
Uthi isiCwangciso sokuPhumeza iNguqu yoMbane esiLungileyo, esavunywa yikhabhinethi kulo nyaka uphelileyo, siza kukhokela inguqu yoMzantsi Afrika ukuya kuqoqosho lwekhabhoni ephantsi ngokunyusa imithombo yamandla ahlaziyekayo nokunciphisa ukuthembela kumalahle.
Umongameli uthe ukutshintsha kwemozulu ngumba wezoqoqosho njengomba wenzululwazi, wamalungelo oluntu kunye nophuhliso kuba unefuthe elithe ngqo kunye nezinto eziphathekayo kuqoqosho lonke.
“Iziphazamiso ezibangelwa kukutshintsha kwemozulu zonyusa iindleko zokwenza ushishino, zidodobalisa ukukhuphisana kwaye zikwadodobalisa namathuba okwanda kwengqesho. Oku kukhokelela ekuthotyweni kwengeniso yerhafu kwaye kunyuswe inkcitho kwintlekele,” utshilo uRamaphosa.
UNondyebo, kunye neKhomishini kaMongameli yeMozulu, iza kuphehlelela ingxelo yeJust Transition Financing Mechanism kwingqungquthela yombane yeentsuku ezintathu. Iza kuchaza ukuxhaswa ngemali kwenguqu yamandla kunye nendlela eya kunyuswa ngayo imali.
“Imali yemozulu nayo ibalulekile kwinguqu yethu. Sifuna utyalo-mali olukhulu ukuze sakhe iziseko zophuhliso ezizinzileyo, ukuphuhlisa ubuchwephesha bendalo nokuxhasa iinkqubo zentlalo,” utshilo uRamaphosa.
We
NgokweBhanki yoPhuhliso lwase-Afrika, imali nje yotshintsho yahlukile kwimali yemozulu. Imali yemozulu inxulumene nenkxaso-mali yesenzo semozulu, amanyathelo anokuthi athathwe ukulwa nokutshintsha kwemozulu, kwaye ayenzelwanga ngokukodwa ukuqwalasela injongo yokungashiyi mntu ngasemva kunye nokuxhasa ngezimali iziphumo zemisebenzi ye-decarbonising kubasebenzi kunye noluntu olusengozini.
Umongameli ubhengeze ukuba i-Just Energy Transition Funding Platform iyakusungulwa kwiinyanga ezimbalwa ezizayo.
Ngokwesicwangciso sophumezo, injongo yeqonga kukudibanisa phakathi kwababoneleli ngenkxaso-mali yesibonelelo kunye nabanokuba ngabaxhamli; ukubonelela ngenkxaso kubasunguli beprojekthi ukubanceda ukuba balungiselele izicwangciso kwaye bafake izicelo zezibonelelo kunye nokubonelela uluntu ngolwazi oluselubala kunye nohlalutyo malunga nokwabiwa kwenkxaso-mali kwiiprojekthi.
Umongameli uthe iqonga lenkxaso-mali liya kuba ngumanduleli obalulekileyo weJust Transition Financing Mechanism ebanzi.
“Simemelela oosomashishini boMzantsi Afrika ukuba batyale imali kwiiprojekthi ezifunekayo ukuze kubekho utshintsho olunempumelelo kweli lizwe,” utshilo uRamaphosa.
