OoKhetshe (Hawks) babambe abarhanelwa abasithoba, kuquka neenkampani ezimbini, kwityala elimalunga nobuqhophololo, urhwaphilizo nokuhlamba imali elinxulumene nekontrakthi ye “yellow fleet” kwiMasipala weSithili saseAlfred Nzo (ANDM).
Us a bath Anele’s babanjwe ngomhla we-11 kuFebruwari 2026 liCandelo LooKhetshe leSerious Corruption Investigation (SCI) kunye neSerious Commercial Crime Investigation (SCCI), lisebenzisana neTactical Response Team (TRT) kunye neNational Intervention Unit (NIU). Abarhanelwa, abaneminyaka ephakathi kwama-43 nama-73, baquka ababesakuba ngamagosa aphezulu eANDM, abasebenzi abanxulumene ne-Avis Fleet Services, kunye nosomashishini.
Abarhanelwa kulindeleke ukuba bavele phambi kweNkundla kaMantyi eMaxesibeni ngomhla we-12 kuFebruwari 2026.
Uphando lwaqalwa emva kokuba umkhweli-sikhalazo exele amagunya ngenkqubo yokuthengwa kwezinto ekuthiwa ayizange ilandelwe ngokusemthethweni xa kuqeshwa umboneleli wenkonzo. Kutyholwa ukuba inkampani eyawongwa ngekontrakthi yayinganazo izixhobo nemishini ye-yellow plant efunekayo ngelo xesha, yaza yaxhomekeka kwizixhobo eziqeshwe kwezinye iinkampani.
Kuthiwa ngoDisemba 2014 omnye wabarhanelwa, esebenzela inkampani yakhe, wasondela kwiANDM enesindululo sokuba kuthengwe imishini ngeendlela ze-hire-purchase. Kutyholwa ukuba le nkqubo ayizange ilandele imigaqo ye-supply chain management, yaza yancediswa kukusetyenziswa gwenxa kwemimiselo yoMthetho woLawulo lwezeMali kooMasipala (MFMA), kusetyenziswa ikhontrakthi ebikhona phakathi kwenkampani kunye nomnye umasipala.
Iingxelo zithi inkampani yayineSivumelwano seFull Maintenance Lease neZeda Car Leasing (Pty) Ltd, esebenza njenge-Avis Fleet Services, esatyikitywa ngomhla we-13 kuJuni 2014. Ngaphantsi kwesi sivumelwano, izithuthi nemishini zaziseyipropathi ye-Avis, kwaye ubunini babungayi kudluliselwa kwinkampani. Nangona kunjalo, ngoJanuwari 2015 iANDM kuthiwa yangena kwisivumelwano se-hire-purchase ngenjongo yokufumana ubunini bezi zixhobo emva kokugqitywa kweentlawulo. Kutyholwa ukuba umboneleli wenkonzo wazichaza ngokungachanekanga njengomnini wezixhobo, nto leyo eyadala umfanekiso wobuxoki wokuba ubunini buza kudluliselwa kumasipala.
Phakathi kukaJanuwari 2015 noAprili 2018, iANDM kuthiwa yahlawula malunga nezigidi ezingama-R75 kule nkampani njengeentlawulo ze-hire-purchase. Uphando lwezezimali lutyhila ukuba imali yadluliselwa kwiakhawunti ezahlukeneyo zabantu neenkampani, kubandakanywa ukurhoxiswa kwemali eninzi kunye neentengiselwano ezilandelelanayo, nto leyo etyholwa njengobungqina bokuhlamba imali.
OoKhetshe bathi uphando luveze ukungahambelani okukhulu kwinkqubo yokuthengwa kwezinto, kuquka ukusetyenziswa gwenxa kwemimiselo yeMFMA ukuxhasa ngokungekho mthethweni umboneleli wenkonzo ongazange ahlangabezane neemfuno ezimiselweyo. Kukwatyholwa ukuba bekukho intsebenziswano engekho mthethweni phakathi kwamanye amagosa kamasipala, umboneleli wenkonzo kunye nabanye abaxhamli, nto leyo ekhokelele ekuphunyezweni kwee-invoyisi zobuxoki nasekuphambukisweni kwemali karhulumente.
INtloko yePhondo yooKhetshe eMpuma Koloni, uMajor General Mboiki Obed Ngwenya, incomile iqela lophando ngomsebenzi walo ochanekileyo nowenziwe ngononophelo ukuqinisekisa ukuba abo babandakanyekayo kurhwaphilizo nakwityala lezoqoqosho bajongana nomthetho.