By Nyameka Lamani & Esona Magawana.
IOofisi yeeNkqubo zoNxibelelwano noLwazi lukaRhulumente kuMasipala oMbaxa waseBuffalo City ibisingethe iNgxoxo yezoShishino kunye neNtsebenziswano yabaseTyhini ukubhiyozela iNyanga yabaseTyhini, bexhobisa oosomashishini ababhinqileyo noomasibambisane ngolwazi lokufikelela kwiinkonzo zikarhulumente kunye namathuba okuxhasa ngemali amashishini abo.
Le ngxoxo ibibanjwe ngentsebenziswano neAmahleke Traditional Council. Eli phulo lijolise ekukhuthazeni ukukhula koqoqosho, ukuveliswa kwezinto ezintsha, nokulingana, liqaqambisa ukuzibophelela kwe-GCIS ekuqinisekiseni abemi abanolwazi.
Abathathi-nxaxheba abathe bathatha inxaxheba kule ngxoxo yokwabelana ngolwazi baquka uMasipala oMbaxa weBuffalo City, iQumrhu loPhuhliso leMpuma Koloni, iSEDAF, iSebe lokuHlaliswa koLuntu, Capitec Bank, iArhente yoPhuhliso yoMasipala oMbaxa waseBuffalo City, iSebe loPhuhliso loLuntu, iSassa, iStatsSA, i-ECRDA, iSebe loPhuhliso loQoqosho, iMicimbi yokusiNgqongileyo kunye noKhenketho, kunye neAvbob.
Emva kodliwano ndlebe nentatheli yeEC Indaba uLindokuhle Nxazoke obemele uGCIS kuNxibelelwano lweNgingqi yoMasipala oMbaxa waseBuffalo City, uphawule wathi ,”IGCIS inexanduva lokuphuhlisa uluntu ngolwazi, siyenza ke lento ngokusondeza amasebe karhulumente ebantwini kwaye utshintsho esinqwenela ukulibona kwaWadi 36, kukuphakama koo somashishini kunye noomasibambisane besebenzisa lonke ulwazi abalifumeneyo kule Ngxoxo ibikhona.
Kwi profayile yale Wadi ebesiyenzile singuGCIS sifumanise ukuba omama balapha abaphakathi kweminyaka engamashumi amathathu anesihlanu (35) ukuyaphezulu bayasokola ukufumana amathuba wophuhliso kunye nengqesho kodwa kwezi ngxogxo bavile ukuba indawo ezinjengo ECDC, SEDFA, ECRDA kunye namanye amasebe wophuhliso ebelapha ayakwazi ukubancedisa ngenkxaso-mali yokuphuhlisa amashishini wabo nokuwaqala bayakwazi ukubancedisa banikwe noqeqesho.”
Uqhubile wathi:,”Umyalezo esinqwenela ukuwunika oosomashishini basetyhini kunye noomasibambisane singuGCIS kukuba, umnyango wethu uhlale uvuliwe ukubancedisa ngokubaxhobisa ngolwazi lwendawo abanonqonqoza kuzo ukufumana uncedo elingabaphuhlisa kwaye sihlala sikhangela amathuba wentsebenziswano ukuze sikwazi ukufikelela eluntwini sizise lamasebe ka rhulumente kufutshane kubo.”
UNomatshawekazi ongumhlali waseMzitshane uthe, “Ndinombulelo ongazenzisiyo kwiGCIS nakumasebe ohlukeneyo athe athatha inxaxheba kulo msitho wanamhlanje. Le nkqubo ibinolwazi olumangalisayo. Umzekelo, bendifake isicelo sendlu yeRDP ukususela ngo-1990, kodwa isicelo sam asizange samkelwe. Nangona kunjalo, namhlanje ndiyifumene ingcaciso apho ndaphazama khona, kwaye namhlanje ibilusuku olubalulekileyo kum.”
Kanti ke noNtombifikile Qhashu naye ongumhlali waseMzitshane, uphawule esithi, “Ndibulela ngokungazenzisiyo ngenkqubo kaGCIS eqhubekileyo namhlanje, sifumene ulwazi oluxabisekileyo, kwaye ndiqinisekile ukuba uluntu lakowethu lwaseAmahleke luzakufumana uphuhliso, sibulela nabantu abathe baqhuba le nkqubo, kwaye sinethemba lekamva eliqaqambileyo”.
UNkosazana Nolusindiso Busoshe omele i-Amahleke Traditional Council phantsi kwenkosi uZamokuhle Busoshe, uvakalise umbulelo ongazenzisiyo kwiOfisi kaMongameli ngale nkqubo, uthi kuninzi abantu abakufundileyo kwaye inkqubo ihambe kakuhle, banethemba ukuba nangomso bangaqhubeka benjenjalo.
