Itshantliziyo elichasene nokufuduka kwabantu uNkosikhona Ndabandaba, owaziwa ngokuba nguPhakel’umthakathi, uthi ufumene ulwazi lokuba abantu babeceba ukumbulala ngaphambi komngcelele woqhankqalazo eDurban ngomhla wamashumi amathathu (30) kweyeSilimela.
Uthi uye watshintsha izithuthi waza walibazisa ukufika kwakhe ukuze asinde kwisoyikiso. Uthe iphulo lakhe lokulwa nokufuduka kwabantu abangenazo iimpepha liza kuqhubeka nokuba kunjalo.
“Ndalunyukiswa ukuba kukho iyelenqe elichasene nam. Ngenxa yolo lwazi, ndalibazisa ukufika kwam ndaza ndatshintsha izithuthi ngaphambi kokuba ndiye kumngcelele,” utshilo.
UNdabandaba ukwathi amapolisa anobuqhophololo akhusela amaqela eziyobisi kwiindawo ezithile zaKwaZulu-Natal. Uthe uceba ukunika uluhlu lwamagama kuKhomishina wamapolisa waKwaZulu-Natal uLieutenant General Nhlanhla Mkhwanazi.
“Kukho abantu ngaphakathi kumapolisa abakhusela abaphuli-mthetho. Ndiza kunika ulwazi endinalo kuKhomishina wamapolisa,” utshilo.
Uthe intshukumo yakhe ngoku iza kutshintsha ingqwalasela yayo iye kumashishini akholelwa ukuba aqesha abantu bamanye amazwe abangenazo iimpepha, ngokuhlolwa kokuthobela imithetho nangokubika ukwaphulwa kwemithetho kwabasemagunyeni.
“Andisoze ndithengise kwaye andisoze ndiyeke ukulwela abantu baseMzantsi Afrika,” utshilo.
Amapolisa athi uninzi lwemingcelele kuzwelonke ngomhla wamashumi amathathu (30) kweyeSilimela ihlale inoxolo, kunye neziganeko ezimbalwa zobundlobongela. UKhomishinala wamapolisa aseGauteng uLieutenant General Tommy Mthombeni uqinisekisile ukubanjwa kwabantu abasibhozo okunxulunyaniswa nemingcelele ukusukela ngomhla wamashumi amabini anesibhozo (28) kweyeSilimela.
Inkokeli yomnye umngcelele kunye nabanye abane babanjwe emva kwengxabano kwivenkile yamanye amazwe apho kuthiwa kwakukho ukuphanga. Abanye abane babanjwe eRosettenville emva kwesiphithiphithi esinxulunyaniswa nokuphangwa kwendlu.
UMphathiswa wezoBulungisa noPhuhliso loMgaqo-siseko uMmamoloko Kubayi, ongusihlalo weKomiti yabaPhathiswa bokuFuduka, uthe abantu baseMzantsi Afrika banelungelo lokuqhankqalaza ngoxolo.
“Siyabancoma abo bathethe norhulumente ngaphambi kokuba bamatshe. Abantu banelungelo lokuqhankqalaza, kodwa sibongoza wonke umntu ukuba ahlale enoxolo,” utshilo.
Uthe imisebenzi yokunyanzelisa ukufuduka iya kuqhubeka kwiiveki ezizayo.
