By Siphiwo Boqwana.
Umqeqeshi weBafana Bafana eMzantsi Afrika uHugo Broos ulibhengezile iqela labadlali nasezaku licutha. Broos ulungiselela imidlalo emibini (2) ezakudlalwa leliqela kwinyanga ezayo yeDwara nalapho bezakuqubisana neqela lebhola ekhatywayo laseCongo, iBrazzaville.
La maqela azakube edlala kwimidlalo yokuzibekela indawo kwindebe yeAFCON kunyaka ozayo ka-2025 eMorocco. Ukhumbule ukuba iBafana Bafana seyidlale imidlalo emibini (2) nalapho idlale ngokulingana kumdlalo wokuqala (1) neUganda ekhaya ngamanqaku amabini macala (2-2) yaze yaphumelela umdlalo wesibini (2) ibetha iSouth Sudan kowayo ngamanqaku amathathu kwamabini (3-2).
IBafana idlale imidlalo emibini (2) yaphumelela umdlalo omnye (1) badlala ngokulingana komnye inamanqaku amathathu (3) ebhodini ihleli kwindawo yesibini(2), kwindawo yokuqala (1) yiUganda.
Kukho abadlali abatsha kweliqela uSinoxolo Kwayiba weChippa United noDevin Titus weStellenbosch F.C.
Naba abadlali ababizwe nguBroos koonozinti nguVeli Mothwa, uRicardo Goss, uSipho Chaine noRonwen Williams.
Kubadlali bangasemva nguThapelo Morena, uNkosinathi Sibisi, uThabiso Sesane, uKhuliso Mudau, uAubrey Modiba, uGrant Kekane, uRushwin Dortley, uSiyabonga Ngezana, uFawaaz Basadien, uSydney Mobbie noBradley Cross.
Abadlali basesiswini nguSinoxolo Kwayiba, uTeboho Mokoena, uJayden Adams, uThalente Mbatha, uBathusi Aubaas, noLuke Le Roux.
Iifolosi nguLyle Foster, uPercy Tau, uMihlali Mayambela, uIqraam Rayners, uPatrick Maswanganyi, uTshegofatso Mabasa, uElias Mokwana, uRelebohile Mofokeng, uThemba Zwane, uOswin Appollis noDevin Titus.
Umdlalo wasekhaya uzakudlalelwa kwibala kumabala iNelson Mandela Bay yiBafana Bafana neCongo eGqeberha ngomhla weshumi elinanye (11) kwinyanga ezayo yeDwarha.
By Siphiwo Boqwana
