UMkomishinala weSithili saseNelson Mandela Bay, uMaj Gen Vuyisile Ncata uncome igosa eliphandayo leSAPS New Brighton ngokukhawuleziswa kobanjwa komrhanelwa omnye ekutyholwa ukuba ubandakanyeka ekubulaweni kukaMarlene Prinsloo kunye nesithandwa sakhe somqhubi weloli ngoMgqibelo, umhla wamashumi amabini nesibini (22/06/2024) eNew Brighton. eGqeberha.
Ngomhla okhankanywe ngasentla, malunga nemizuzu engamashumi amane nethoba emveni kwentsimbi yokuqala ekuseni (01:49), esi sibini sasihleli kwilori yaso yokutsala eKings Beach xa sifikelwa yindoda eyabaxelela ukuba ifuna uncedo njengoko iToyota Corolla yayo iye yaxinga kwisanti yolwandle kwaye efuna imoto yakhe itsalelwe ngaphandle. Umqhubi welori wayincedisa le ndoda emva kokuba bevumelene ngentlawulo. Emva kokubonisa esi sibini ukuba akanamali kuye, esi sibini samlandela saya eNew Brighton ukuze sifumane imali.
Umqhubi weToyota Corolla ebekhatshwe yenye indoda nabafazi ababini. Bathe xa besondela kwisitalato iShiya Kulati, umqhubi weToyota Corolla wajikela kwisitalato uMtiya wamisa isithuthi. Umqhubi welori wamisa, yaye emva kokubuza ngentlawulo, wadutyulwa, mqhubi welori yena wonzakala.
Umqhubi welori wabalekela kwisibhedlele sabucala eKorsten apho kwafunyaniswa ukuba uMarlene Prinsloo, oneminyaka engamashumi amabini anesixhenxe (27) ubudala wayesele eswelekile kwaye umqhubi walaliswa ukuze afumane unyango olongezelelweyo.
Njengoko uphando luqhubeka, umrhanelwa oneminyaka engamashumi amathathu nesine (34) ubudala wabanjwa ngoLwesihlanu umhla weshumi elinethoba (19/07/2024), kwindlu yaseJoe Slovo. Umrhanelwa uvalelwe ngezityholo zokubulala nokuzama ukubulala. Uphando lusaqhuba, kwaye kusaza kubanjwa abanye abantu.
Umrhanelwa uzakuvela kwinkundla kamantyi yaseNew Brighton ngoMvulo we-22/07.