IGunyabantu lezoTshutshiso (NPA) eGqeberha ithi lisiqaphele isigwebo seNkundla ePhakamileyo yoMzantsi Afrika, eMpuma Kapa, efumanise ukuba uMvangeli kaMabonakude uTimothy Omotoso (63) nabanye ababini atyholwa nabo uLusanda Sulani (41) noZikiswa Sitho (33) bengenatyala kwizityholo ezingamashumi amathathu anesibini (32) ebebebekwe zona nguMbuso.
Kwisigwebo esikhutshwe nguJaji, u-Irman Schoeman uye wafumanisa ukuba aba bathathu abanatyala ngenxa yokusilela kobungqina kunye nengxaki zobuchwephesha, ingakumbi abo babesakuba ngabatshutshisi kweli tyala ngoba benza ngendlela engafanelekanga kwaye abatyholwa abazange bancinwe ngokwaneleyo ngurhulumente.
Kungenxa yeso sizathu ukuba iqela elitshutshisayo liya kufunda isigwebo kwaye lithathe isigqibo sokuba yeyiphi na indlela yomthetho enokuphononongwa.
Isithethi se-NPA eMpuma Kapa, uMnumzana Luxolo Tyali ubhale wathi: “Ukusukela ekubanjweni kwaba bathathu ngo-Tshazimpuzi ka-2017, ityala labo liye lathatha ixesha elide linemiqobo emininzi, kuquka izicelo zokungenelela zabatyholwa eziquka nemingeni kwiNkundla yoMgaqo-siseko. Ezona zicelo zamva nje zazingamangenelo amahlanu akhethekileyo ngenxa yokunganyaniseki kunye nesicelo esenziwe nge-16 yoMqungu 2024, apho umkhuseli wenze isicelo sokuba ijaji iphinde iqwalasele isigwebo sakhe sangaphambili kwisicelo sokukhululwa ngokweCandelo le-174 loMthetho weNkqubo yoLwaphulo-mthetho, olwachaswa ngempumelelo ngurhulumente.”
“Ulibaziseko oluqhubeke kwelityala lubangele ukuba amanye amangqina angabi safuna ukuqhubeka nokunika ubungqina nanjengoko ebonise ukuba sele eqhubekile nobomi bawo kwaye akanamdla wokuphinda athethe ngamava abo enkundleni. Lo nto ikhokelele ekwehlisweni kwezityholo ukusuka ku-63.”
Le mbalelwano igqibelise ngelithi nangona i-NPA ingafuni ukufumana isigwebo ngazo zonke iindleko, ihleli izibophelele ekuqinisekiseni ukuba ubulungisa buyenziwa kumaxhoba olwaphulo-mthetho kwaye iya kwenza konke okusemandleni ukunika ilizwi kumaxhoba ngokuphonononga zonke iindlela ezinokubakho.
